Засгийн газрын ээлжит бус хуралдаан яг одоо эхэлж байна. Хуралдаанаар Лондонгийн олимпийн зуны XXX наадамд амжилттай оролцож, Монголынхоо төрийн далбааг олимпийн тэнгэрт мандуулсан тамирчдад мөнгөн шагнал олгох тухай асуудлыг хэлэлцэж байна.

Тодруулбал, ээлжит бус хуралдаанаар Лондонгийн олимпод амжилттай оролцож,  мөнгө, хүрэл медаль хүртсэн  Монгол Улсын Хөдөлмөрийн баатар, Гавьяат тамирчин Н.Түвшинбаяр, ОУХМ С.Ням-Очир нарт шагнал олгох тухай асуудлыг яг одоо ярилцаж байна. Тамирчдад мөнгөн шагнал олгох тухай асуудлыг хэлэлцэн шийдвэрлэнгүүт нэр бүхий тамирчдад шагналыг нь гардуулах аж. Тиймээс Лондонгийн олимпиос хүрэл медаль хүртсэн, жүдо бөхийн ОУХМ С.Ням-Очир Төрийн ордонд хүрэлцэн ирээд байгаа бол Монгол Улсын Хөдөлмөрийн баатар, Гавьяат тамирчин Н.Түвшинбаяр бэртлийн улмаас ирж чадаагүй байна. Ээлжит бус хуралдаанаар үргэлжлүүлэн аймаг, нийслэлийн өвөлжилтийн бэлтгэлийг хангах ажлын талаар мэдээлэл сонсох аж.