“Лондон-2012” зуны 30 дахь удаагийн олимпийн наадам өнөөдөр ес дэх өдрөө үргэлжилж байна. Олимпийн наадамд эх орноо төлөөлөн оролцох 29 тамирчнаас жүдо, байт харваа болон усанд сэлэлтийн тамирчид маань тэмцээнээ дуусгаад байгаа бол боксын тэмцээний медалийн төлөө өрсөлдөх тамирчид тодорч, чөлөөтийнхөн 8-наас тэмцээнээ эхлүүлэхээр зэхэж байгаа юм.

Харин өнөөдөр Монголын баг тамирчдаас ОУХМ Л.Отгонбаяр эмэгтэйчүүдийн марафон гүйлтийн төрөлд хурд сорих гэж байна. Тэсвэр тэвчээр, хатуужлын туйлыг шалгадаг энэ төрөлд Монголын хоёр тамирчин өрсөлдөх билээ. Өнөөдөр болох эмэгтэйчүүдийн уралдаанд Л.Отгонбаяр, харин олимпийн наадмын сүүлийн өдөр буюу наймдугаар сарын 12-нд болох эрэгтэйчүүдийн марафон гүйлтийн тэмцээнд Гавьяат тамирчин Б.Сэр-Од хурд сорих билээ.

Эмэгтэйчүүдийн марафон гүйлт өнөөдөр Монголын цагаар 18.00 цагт эхэлнэ. Энэ төрөлд дэлхийн дээд амжилт хоёр цаг, 15 минут, 25 секунд, харин олимпийн рекорд 2:23:14 байдаг аж. Л.Отгонбаярын хувьд хувийн дээд амжилт нь 2:39:50 юм байна.