Бээжингийн олимпийн аварга, Монгол Улсын Хөдөлмөрийн баатар, Гавьяат тамирчин Э.Бадар-Ууган бэртлийн улмаас Лондонгийн олимпийг өнжиж байгаа ч Монгол Улсын Ерөнхийлөгч Ц.Элбэгдоржийн урилгаар олимпийн хотод зочилж, Монголын баг тамирчдаа дэмжээд ирсэн билээ.

Тэрбээр дөнгөж сая EAGLE NEWS телевизэд зочилж, олимпийн наадмын тухай болон Монголын боксчдын олимпийн рингэн дэх тулаан, Ерөнхийлөгчийн хамт Лондонд зочилсон талаараа сонирхолтой ярилцлага өглөө.

Олимпийн аваргын оролцсон “Алтын төлөө хамтдаа” нэвтрүүлгийн давталтыг өнөөдөр орой 20.30, 22.30 цагаас хүлээн авч үзэх боломжтой юм байна. Хөдөлмөрийн баатар Э.Бадар-Ууган, Х.Цагаанбаатар, Б.Наранбаатар нар Монгол Улсын Ерөнхийлөгчийн спортын асуудал хариуцсан орон тооны бус зөвлөхөөр ажилладаг. Зөвлөхийн хувьд тэрбээр дээрх нэвтрүүлгийн үеэр цоо шинэ мэдээлэл өгсөн нь Монголын тамирчдад зориулсан спортын тэтгэлэг бий болгох гэж байгаа тухай байлаа.

Олимп, дэлхийн аварга шалгаруулах тэмцээнээс медаль хүртсэн тамирчдад насан туршийн тэтгэлэг олгох тухай асуудлыг Монгол Улсын Ерөнхийлөгч дэмжин, боловсруулж байгаа бөгөөд тун удахгүй албан ёсоор энэ тухай олон нийтэд танилцуулах ажээ.