МАХН-МҮАН-ын “Шударга ёс” эвслийн Удирдах зөвлөлийг өнөө өглөө 09.00 цагаас хуралдуулахаар зарлаад байсан юм. Энэ талаар УИХ-ын гишүүн Д.Тэрбишдагваас сая тодруулахад одоогоор хуралдаж амжаагүй, гэхдээ хуралдана гэж байлаа.

Гурван өдөр үргэлжилсэн МАХН-ын дарга Н.Энхбаярыг шүүх хурал өчигдөр үдэш дуусч түүнд дөрвөн жил хорих ял оноон мөн өдрөөс хэрэгжүүлэхээр болсон. Түүний дараа МАХН-МҮАН-ын “Шударга ёс” эвслийн байранд шөнийн 00.00 цагаас Н.Энхбаярын өмгөөлөгч С.Нарангэрэл хэвлэлийн бага хурал зохион байгуулж хууль, шүүхийн байгууллага хэлмэгдүүлэлт явуулж байна хэмээн мэдэгдэж давж заалдах 14 хоногийг хүлээлгүйгээр өнөөдрөөс давах ажлаа эхэлнэ гэж байлаа.

Болсон үйл явдалтай холбогдуулан “Шударга ёс” эвслийн Удирдах зөвлөлийг өнөө өглөө 09.00 цагаас хуралдуулахаар зарласан ч амжаагүй байгаа юм байна.

УИХ-ын олонхийг бүрдүүлэгч нэг субъект болох “Шударга ёс” эвслийнхэн шүүх хурлын дүнг харахаар болж өчигдөр чуулганы анхдугаар хуралдаан тасарсан. Өнөөдөр чуулганы хуралдаан, байнгын хороод хуралдах эсэх, хуралдвал хэдэн цагаас гэдэг тодорхойгүй байна.