"Лондон-2012" зуны XXX олимпийн наадмын жүдо бөхийн эрэгтэйчүүдийн -100
кг-ын жинд барилдаж буй Монгол Улсын Хөдөлмөрийн баатар, Гавьяат
тамирчин Н.Түвшинбаяр дөнгөж сая хагас шигшээ барилдаанд БНСУ-ын жүдоч Хван Хи-тэй хүч үзэж, ялснаар мөнгөн медалийн болзол хангаж, аваргын алтан медалийн төлөө өрсөлдөх эрхтэй боллоо.

Тайландын жүдоч Теерават Хомклинийг ердөө 55 дахь секундэд цэвэр ялснаар ялалтын буухиагаа эхлүүлсэн тэрбээр удаахь барилдаандаа дэлхийн аваргын хүрэл медальт, Францын жүдоч Тьерри Фабрег сөхрүүлж, улмаар Узбекистаны жүдоч Рамзиддин Саидовыг Golden score буюу нэмэлт цагт үүрэх мэхээр цэвэр ялснаар хэсгийн аварга болсон. Узбекистаны жүдоч нь 2004 онд 81 кг-ын жинд Ази тивийн аварга болж байсан, 2006 оны Дохагийн Азийн наадамд 90 кг-д зодоглож, хүрэл медаль хүртэж байсан чамгүй хүчтэй өрсөлдөгч байлаа. Ингээд хагас шигшээ барилдаанд 90 кг-ын жинд дэлхийн аварга цол хүртэж байсан, Азийн наадмын хошой аварга, Азийн аваргын хошой мөнгөн медальт, БНСУ-ын жүдоч Хван Хи-тэйтэй барилдаж, юүко үнэлгээгээр яллаа. Барилдааны явцад манай тамирчны хөлийн бэртэл сэдэрсэн ч шүд зуун барилдаж, хүчтэй өрсөлдөгчөө буулган авсан юм.

Одоо тэрбээр олимпийн аваргын алтан медалийн төлөө 2009 оны Европын аварга, 2011 оны дэлхийн аварга, ОХУ-ын Тагир Хайбулаевтай өрсөлдөх юм.

Мөнгөн медалийн төлөөх барилдааныг ЭНД дарж үзнэ үү.