Олон улсын модон бөмбөгийн нээлттэй дөрөвдүгээр тэмцээн 2012 оны 07 сарын 29-30-ны өдрүүдэд Байгаль нуурын эрэг дэх “Сухая” спортын баазад Буриад улсын Биеийн тамир, спортын газар, Зэдийн аймгийн захиргаа, тус улсын модон бөмбөгийн холбооноос эрхлэн амжилттай зохион байгуулагдлаа. Тус тэмцээнд Монгол улсаас Улаанбаатар хот болон Дархан-Уул, Говь-Алтай аймаг, ОХУ-ын Буриад улсын Кижинга, Хиагт, Зэдийн аймаг, Улаан-Үд хотын зэрэг 7 байгууллагын баг тамирчид оролцсон юм. Тэмцээн ганцаарчилсан /эрэгтэй, эмэгтэй/ 24 талбайд, талбайн цохилт /эрэгтэй, эмэгтэй/, холимог хос, багийн /эрэгтэй, эмэгтэй/ гэсэн 5-н төрлөөр явагдаж дүнгээ гаргажээ.

Тэмцээний цохилтын төрөлд эрэгтэйчүүдээс Стандартчилал, хэмжил зүйн газрын хэлтсийн дарга Ж.Буяндалай /85 оноо/, Дархан-Уул аймаг дахь ШУТИС-ийн оюутан Б.Доржцэрэн /91 оноо/, ХААИС-ийн оюутан Б.Баянбулаг /91 оноо/, эмэгтэйчүүдээс Говь-Алтай аймаг дахь ЭМШУИС-ийн багш Н.Энх-Амгалан /95 оноо/, Дархан-Уул аймаг дахь ШУТИС-ийн оюутан Г.Энэрэл /101 оноо/, Н.Мягмарсүрэн /105 оноо/ тус тус эхний 3-н байрт шалгарч алт, мөнгө, хүрэл медалийн эзэд болжээ.

Багийн дүнгээр Д.Жаргалсайхан ахлагчтай Улаанбаатар хотын эрэгтэйчүүдийн баг 385 оноогоор, Н.Мягмарсүрэн ахлагчтай Дархан-Уул аймаг дахь ШУТИС-ийн эмэгтэйчүүдийн баг 424 оноогоор тэргүүлэн цом, медаль, өргөмжлөлөөр шагнуулжээ. ОХУ-ын Буриад улсад 2006 оноос эхлэн 2 жил тутамд зохиогддог олон улсын тэмцээнд Монголын баг тамирчид тогтмол оролцож спортын өндөр амжилт үзүүлж байсан уламжлалтай юм.

Энэхүү тэмцээнд амжилттай оролцсон баг тамирчдаас сонгон БНХАУ-ын Ордос хотноо 08 сарын 27-30-ны өдрүүдэд зохиогдох Монгол туургатны спорт, урлагийн их наадамд оролцох Монголын модон бөмбөгийн шигшээ багийн бүрэлдэхүүнийг шалгаруулсан юм. Монголын шигшээ багийн бүрэлдэхүүнээр Ж.Буяндалай, С.Батцоож, Ц.Баасанжаргал, Б.Баянбулаг, Б.Доржцэрэн, Д.Мөнх-Оргил, Н.Энх-Амгалан, Н.Мягмарсүрэн, Г.Энэрэл, Г.Ижилцэцэг, Н.Долгорсүрэн, Ц.Батцэрэн зэрэг эрэгтэй 6, эмэгтэй 6 тамирчин оролцохоор шалгарсан юм.  Модон бөмбөгийн улсын аварга шалгаруулах тэмцээн 2012 оны 9 сард Монгол шилтгээний модон бөмбөгийн талбайд зохион байгуулагдах болно гэж Монголын модон бөмбөгийн холбооноос мэдээллээ.