Ойрын өдрүүдэд Төрийн ордонд соёлын довтолгоо болоод сүйд. Энэ довтолгоо эрхэм гишүүд, гишүүдийн туслах гэсэн хүрээг хамарч байна. Өнгөрсөн долоо хоногоос эхлэн энэ аян өрнөсөн бөгөөд гишүүд ба туслахуудыг хамгийн сүүлийн үеийн компьютерээр хангаж эхэлсэн байна. Энэ ажлын хүрээнд дахин сонгогдоогүй гишүүд болон туслахуудаас нь ipad-ийг нь буцаан хураах гэж хариуцсан мэргэжилтнүүд нь үйл лайгаа эдлэх болжээ. Зарим нь утсаа салгаад алга болчихсон учраас хөөрхий мэргэжилтнүүд төлбөрт унаж ч магадгүй болж. Харин юм үзэж, нүд тайлсан нэгнээс нь авсан ipad-уудыг “ариутгах” ажилд Төрийн ордоны үйлчлэгч нарыг дайчлаад байна. Гадна гэрээс нь эхлээд доторх эсэн бусын зураг сэлт зэрэг нянгуудыг нь цэвэрлээд шинээр Төрийн ордонд тухлагсдад хүлээлгэн өгөх аж.

Сонгууль болгоны дараа уламжлал ёсоор техникийн шинэчлэл хийдэг ч энэ удаад бүр соёлын довтолгооны хэмжээнд хийв. Эрхэм гишүүд тэдний туслахуудад тарааж буй зөөврийн компьютер нь л гэхэд i5 бол суурин компьютер нь түүнээс дутахааргүй аж. Үзүүлэлт өндөртэй хэрэгслүүдэд дан сүүлийн үеийн оффисийн программ суулгасан ч түүнийх нь шидийг гаргаж ажиллах хүн алга.

Харин ч эсэргээрээ техникийн албаныханд төвөг удах болжээ. Тэжээлийнх нь залгуурыг залгаагүй байж,

-Энэ компьютер чинь ажиллахгүй байна гэж ирээд л дуудлага өгөх нь энүүхэнд байгаа бололтой. Сүүлийн үед техникийн ажилтнуудад  “Мессенжер ажиллахгүй байна” гэсэн дуудлага зонхилох болжээ. Ер нь л компьютерээ асаахаас цаашгүй олон хүн ордонд орж ирсэн юм байх аа.

Тиймээс энэ бүх ачааллыг багасгахын тулд Төрийн ордон компьютерийн анхан шатны сургалт ч хийж магадгүй нөхцөл байдал үүсээд буй гэнэ.

Ямартай ч Төрийн ордоныхон маань техникийн дэвшилээс хоцролгүй явна. Харин өөрсдөө яасныг хэлэх нь илүүц биз.