Хоёр жил тутамд зохион байгуулдаг дэлхийн шатрын олимпиад энэ сарын 27-ноос ирэх сарын 10-ныг хүртэл Туркийн нийслэл Станбул хотод болно. 1924 оноос хойш нийт 39 удаа зохион байгуулсан уг тэмцээнд манай улсын эрэгтэй баг 21, эмэгтэйчүүд 14 дэх удаагаа оролцох гэж байгаа юм. Тэгвэл шатрын 40 дүгээр олимпиадад оролцох Монголын баг тамирчид тодорчээ. Станбулд өрсөлдөх баг тамирчдыг Монголын шатрын холбооны ерөнхий нарийн бичгийн дарга Г.Баатар ахалж байгаа юм. Харин Монголын шатрын холбооны шүүгчдийн зөвлөлийн дарга, олон улсын шүүгч, ФИДЕ мастер Г.Алтан-Оч тэмцээний шүүгчээр ажиллах ажээ. Шатарчдыг Гавьяат дасгалжуулагч, олон улсын мастер П.Жигжидсүрэн, олон улсын шатрын холбооны шүүгч, дэд мастер Ц.Батсайхан нар дасгалжуулна. Тэмцээн оролцох оюуны тамирчдыг танилцуулъя.

Эрэгтэй баг:

Олон улсын мастер Б.ГҮНДАВАА: Улсын гурван удаагийн аварга, ЦЕГ-ын “Хүч” спорт хороо, “Шунхлай” группийн тамирчин. Уг олимпиадад дөрөв дэх удаагаа оролцох гэж байна.  
      
Их мастер Д.ШАРАВДОРЖ: Улсын гурван удаагийн аварга. “Хан Алтай” клубын тамирчин, олимпиадад тав дахь удаагаа оролцоно.     
    
Их мастер Ц.БАТЧУЛУУН: Улсын аварга, Зэвсэгт хүчний “Алдар” спорт хороо, Баянхонгор аймгийн тамирчин, олимпиадад гурав дахь удаагаа оролцож байна.

ФИДЕ мастер Г.МӨНХГАЛ: Өвөрхангай аймгийн тамирчин, уг тэмцээнд анх удаа оролцоно.        

ФИДЕ мастер М.ГҮНБАЯР: Улсын аварга, хоёр дахь удаагаа олимпиадад оролцох юм.

Эмэгтэй баг:

Их мастер Б.МӨНГӨНТУУЛ: Улсын аваргын хошой мөнгөн медальт Зэвсэгт хүчний “Алдар” спорт хорооны тамирчин, шатрын олимпиадад долоо дахь удаагаа оролцож байна. Түүний хувьд хэдхэн хоногийн өмнө Армяны Жермук хотод болсон эмэгтэй шатарчдын Гран-Пригийн тав дахь цувралд тэмцээнд оролцоод ирсэн юм.

Их мастер Т.БАТЧИМЭГ: Улсын аварга, ШШГЕГ-ийн “Сүлд” спорт хороо,  “Мончесс” клубын тамирчин, олимпиадад хоёр дахь удаагаа оролцоно.

Олон улсын мастер Д.ЯНЖИНДУЛАМ: Улсын гурван удаагийн аварга, Зэвсэгт хүчний “Алдар” спорт хороо, “Мончесс” клубын тамирчин, дөрөв дэх удаагаа оролцоно. 

ФИДЕ мастер С.ОТГОНЖАРГАЛ: Улсын аварга, ОБЕГ-ын “Аврагч” спорт хороо, “Хас” банкны тамирчин, гурав дахь удаагаа оролцоно.

Олон улсын мастер Б.АНХЧИМЭГ: Улсын дөрвөн удаагийн аварга, Хан-Уул дүүрэг, “Мобиком” корпорацийн тамирчин, олимпиадад зургаа дахь удаагаа оролцох юм.

Станбулд болон дэлхийн шатрын 40 удаагийн олимпиадад дэлхийн 180 орчим улсын шатарчин өрсөлдөхөөр албан ёсоор мэдүүлгээ өгчээ.