Лондонгийн зуны XXX олимпийн наадмын буудлага спортын эмэгтэйчүүдийн 25 метрийн спорт гар бууны дасгалд шигшээ буудлагад өрсөлдөх тамирчид тодорлоо.

БНСУ-ын тамирчин Ким Жанми урьдчилсан буудлагад 591 оноо авснаар олимпийн дээд амжилт эвдэж, нэгдүгээр байрт бичигдсэнээр шигшээд шалгарлаа. Түүний араас Тайланд, БНХАУ, ОХУ, Украйн, Унгар, БНАСАУ болон Сербийн тамирчид шигшээ наймд багтжээ.

ШИГШЭЭ БУУДЛАГАД ӨРСӨЛДӨХ ТАМИРЧИД:

1.    Ким Жанми /БНСУ/ – 591 оноо (98, 100, 100, 98, 97, 98)
2.    Таняпорн Пруксакорн /Тайланд/ – 586 оноо (100, 97, 98, 98, 97, 96)
3.    Чен Ин /БНХАУ/ – 585 оноо (97, 95, 96, 98, 99, 100)
4.    Кира Мозгалова /ОХУ/ – 585 оноо (93, 99, 97, 99, 99, 98)
5.    Олена Костевич /Украйн/ – 585 оноо (98, 96, 99, 100, 95, 97)
6.    Зофия Цонка /Унгар/ – 584 оноо (98, 96, 97, 99, 98, 96)
7.    Жо Ён Сук /БНАСАУ/ – 583 оноо (94, 97, 97, 98, 98, 99)
8.    Зорана Арунович /Серби/ – 583 оноо (97, 99, 97, 96, 95, 99)

Дашрамд дурдахад, урьдчилсан буудлагад БНАСАУ, Сербийн тамирчдаас гадна Болгарын Мария Гроздева нар ижил 583 оноо авсан тул тэдгээр гурван тамирчин дахин таван сум буудсан. Ингээд БНАСАУ-ын тамирчин 50, Сербийн 49, харин Болгарын тамирчин 48 оноо авсан тул Жо Ён Сук, Зорана Арунович нар финалд өрсөлдөх эрхээ авчээ. Шигшээ буудлага Монголын цагаар 22.30 цагт эхэлнэ.

Харин энэ дасгалд өрсөлдсөн Монгол Улсын тамирчин О.Гүндэгмаагийн тухайд урьдчилсан буудлагад precision төрөлд 284 (93, 95, 96), rapid төрөлд 293 (99, 99, 95), нийт 577 оноо авснаар 39 тамирчнаас 27 дугаар байрт бичигдсэн амжилтаар олимпийн наадмыг өндөрлүүллээ. Тав дахь олимпийн наадамдаа оролцсон тэрбээр анхлан 1996 оны Атлантын олимпийн наадамд шагналт тавдугаар байрт, 2000 оны Сидней, 2004 оны Афины олимпийн наадамд зургадугаар байрт, харин 2008 оны Бээжингийн олимпийн наадмаас мөнгөн медаль хүртэж байсан билээ.