Төв цэнгэлдэх хүрээлэнд маргааш 15 цагаас Монголын хөнгөн атлетикийн холбооноос зохион байгуулж буй Хөнгөн атлетикийн улсын аварга шалгаруулах тэмцээний нээлт болох ажээ. Улсын аварга шалгаруулах тэмцээнд нийслэл болон орон нутгийн 25 байгууллагын  500 гаруй тамирчин оролцохоор бүртгүүлсэн байна. Тэмцээн дараах төрөл, зайд болно.
·    13-15 насны хөвгүүд, охид 100, 200, 400, 800, 1500, 3000 метр, урт болон өндрийн харайлт, буухиа /4х100м/.
·    16-18 насны хөвгүүд, охид 100, 200, 400, 800, 1500, 3000, 5000 метр, урт болон өндрийн харайлт, буухиа /4х100м/ болон /4х400 м/.
Тэмцээний төрөл бүрт эхний гурван байрын эзнийг шалгаруулах бөгөөд багийн дүнгээр эхний зургаан байрыг шалгаруулах юм байна. Шагналт байрт шалгарсан баг тус бүр, цом, өргөмжлөл, мөнгөн шагналын эзэн болох бөгөөд тэмцээний эцсийн дүн ирэх бямба гаригт тодорхой болох юм.