Дэлхийн мисс шалгаруулах 62 дахь удаагийн тэмцээн ӨМӨЗО-ны Ордос хотод энэ сарын 19-нд эхэлсэн билээ. 2012 оны "Дэлхийн мисс" шалгаруулах тэмцээнд эх орноо төлөөлөн оролцож байгаа Хүсэлбаатарын Баярмаа долдугаар сарын 26-нд болсон "World Fashion Designer" номинацид “Шилмэл Загвар” агентлагийн хувцсаар оролцлоо. Шалгаруулалтын дүн тун удахгүй гарч, тэргүүлсэн нэг оролцогч хагас финалд шууд шалгаран үлдэх юм байна.

Мисс Х.Баярмаагийн хувьд хэдийгээр бэлтгэл хийх хугацаа бага байсан ч жүжигчин мэргэжилтэй учраас байнгын бэлтгэлтэй байсан хэмээн түүний ээж, жүжигчин С.Өлзийхүү ярьсан юм. Тэрбээр охинтойгоо байнга холбоотой байгаа бөгөөд ажлынхаа боломжоор охиноо очиж дэмжих бол сүүлийн шатны шалгаруулалтад  түүний хань, “Шинэ өнгө” продакшны захирал Ц.Хүсэлбаатар Ордост очин охиноо дэмжихээр болжээ.

Дэлхийн миссийн тэмцээнд өрсөлдөж байгаа орон орны гоо бүсгүйчүүд ӨМӨЗО-ны Ордос хотын “Crown Plaza”-д байрлаж байгаа бөгөөд тэд Хонгконг, Хайнань мужийн Саня хотоор аялан далайн эрэг дээр усны хувцастай зураг авалтад орсон бол өнөөдөр Шанхай хот руу аялж, хандивын арга хэмжэээнд оролцох юм байна.