Монгол Улсын түүхэнд анх удаа буудлага спортын урт бууны төрөлд эх орноо төлөөлөн оролцсон ОУХМ Н.Баяраа эрэгтэйчүүдийн хийн урт бууны 10 метрийн дасгалд өрсөлдөж, 23 дугаар байрт бичигдлээ. Тэрбээр урьдчилсан дасгалд 593 /100, 96, 99, 100, 98, 100/ оноо авснаар нийт 47 тамирчнаас 23 дугаарт эрэмбэлэгдэв. Тэмцээний дүрмийн дагуу эхний найман байрт бичигдсэн тамирчид шигшээ буудлагад өрсөлдөж, тэндээс медалийн эзэд тодрох юм.

Н.Баяраагийн хувьд дахин хоёр дасгалд өрсөлдөх юм. Наймдугаар сарын 3-нд урт бууны хэвтээ байрлалаас буудах дасгалд, харин 6-нд гурван байрлалаас буудах дасгалд онч сорих хуваарьтай байна.