“Лондон-2012” зуны XXX олимпийн наадмын тэмцээн, уралдааны хоёр дахь өдрийн дараах байдлаар Хятадын баг тамирчид зургаан алт, дөрвөн мөнгө, хоёр хүрэл, нийт 12 медаль хүртсэн амжилтаар медалийн тоо болоод чансаагаар тэргүүлж байна.

Буудлага спортын эмэгтэйчүүдийн 10 метрийн хийн урт бууны төрөлд олимпийн анхны аваргын алтан медаль хүртсэн Хятадын тамирчид олимпийн эхний өдөр дөрвөн алт, хоёр хүрэл, нийт зургаан медаль хүртсэн бол хоёр дахь өдөр буюу өчигдөр хоёр алт, дөрвөн мөнгөн медаль нэмж авчээ. Нутагтаа зохион байгуулсан 2008 оны олимпийн наадамд 51 алт, нийт 100 медаль хүртэж байсан Хятадын баг тамирчид энэ удаад ч мөн багийн амжилтаар тэргүүлэх зорилго тавиад буй билээ. Өмнөх олимпийн аваргуудаас 39 нь Лондонгийн олимпод өрсөлдөж байгаа аж.

Хятадын баг тамирчдаас АНУ-ын баг удаалж байна. Тэд одоогоор гурван алт, таван мөнгө, гурван хүрэл медаль хүртээд байгаа юм. Харин тэдний араас Итали /2-3-2/, БНСУ /2-1-2/ болон Францын баг /2-1-1/ тамирчид удаалж байна.

Олимпийн наадмын эхний хоёр өдрийн дараах байдлаар нийт 30 орны тамирчид медаль хүртжээ.