Долоон жилийн өмнө эхэлсэн “Лондон 2012” олимпийн бэлтгэл ажил дуусч, дэлхий нийтээр амьсгаа даран хүлээж буй нээлтийн ёслол хэдхэн цагийн дараа эхлэх гэж байна. Олимпийн цэнгэлдэх хүрээлэнд гурван цаг үргэлжлэх нээлтийн ёслолын ажиллагааг дэлхийн нэг тэрбум хүнд телевизээр шууд дамжуулан үзүүлэх юм. Олимпийн бамбарын сүүлчийн өртөө нь Темза мөрөн дээрх хатан хааны хөлөг онгоц байх аж. Аварга том хонх Их Британийн цагаар 08:12 минутад гурван удаа цохисноор Соёлын олимп эхэлснийг зарлах бөгөөд Биг Бен 40 удаа цохилох гэнэ. Нээлтийн ёслол Оскарын шагналт найруулагч Дэнни Бойлын бүтээсэн олимпийн тухай богино хэмжээний киногоор эхлэх аж. Нээлтийн ажиллагаа болох 15,000 м2 талбайд нэг сая ваттын PA систем, 500 гаруй өсгөгч бэлдсэн байна. Нээлтийн ёслолын ажиллагаанд Их Британийн хатан хаан, алдартнууд, тамирчид зэрэг 80,000 гаруй хүн оролцоно гэж зохион байгуулагчид таамаглаж байна. Олимпийн нээлтийн ёслолын хамгийн үнэтэй 2,012 болон 1,600 фунт стирлингийн тасалбарууд зарагдаж дуусаагүй байгаа аж. Олимпийн бамбар өнөөдөр 60 хоногийн аяллаа өндөрлөж, олимпийн цэнгэлдэхэд бадамлах билээ. Хамгийн сүүлчийн олимпийн бамбар баригч нь сагсан бөмбөгийн тамирчин 22 настай Амбер Чарльз юм. Харин олимпийн бамбарыг цэнгэлдэхэд бадамлуулах хүний нэрийг нууцалж байгаа юм байна. Өнөөдөр Их Британийн хатан хаан Элизавета II, хунтайж Филипп нар Букингемийн ордонд төр засгийн тэргүүдийг хүлээн авах аж. Нээлтийн ёслолд зориулсан хүндэтгэлийн концертод “Snow Patrol”, “Stereophonics”, “Duran Duran” зэрэг Их Британийн алдартай хамтлагууд, дуучин Paolo Nutini нар тоглох юм. Лондон 2012 олимпийн наадамд 204 орны 10,000 гаруй шилдгийн шилдэг тамирчид эх орныхоо нэрийг дуурсгаж, далбаагаа мандуулан, төрийн дуулалаа эгшиглүүлж, дараагийн олимпийн наадам хүртэл бахархан яригдах алдрын төлөө өрсөлдөх болно.