Нийслэлийн III амаржих газрыг өнгөрсөн тавдугаар сарын 28-наас эхлэн энэ сарын 05 хүртэлх хугацаанд үйл ажиллагааг нь түр хааж, их засвар хийсэн юм. Тус эмнэлэг долдугаар сарын 05-наас эхлэн өвчтөнүүдээ хүлээн авах ёстой байсан ч дөнгөж өчигдрөөс үйл ажиллагаагаа явуулж эхэлжээ. 

Энэ талаар Нийслэлийн III амаржих газрын ерөнхий эмч, Клиникийн профессор, анагаах ухааны магистр Д.Бат-Очироос тодрууллаа.
 
-Эмнэлэг хэзээнээс эхлэн ажиллаж эхэлсэн бэ?

-Манай амаржих газар өчигдөр 12.00 цагаас эхлэн хэвийн үйл ажиллагаагаа явуулж эхэлсэн. Амаржих эхчүүдээ хүлээж аваад байна.

-Өчигдрийн байдлаар хэдэн эмчлүүлэгч хүлээж авав?

-Нийт 12 хүн хүлээж авсан. Манай эмчлүүлэгсэд өнгөрсөн хугацаанд I эмнэлэгээр үйлчлүүлж байсан. Одоо эндээ аваад эхлэхээр I амаржих газрын ачаалал багасах байх.

-Барилгын засварын ажил энэ сарын 05-нд дууссан. Ямар учраас эмчлүүлэгчдээ хүлээж авахгүй байсан юм бэ?

-Эрүүл мэндийн сайдын тушаал болоод манай амаржих газрын стандартаар амаржих газрыг зургаан сар тутамд 14 хоног хааж ариутгадаг. Энэ журмын дагуу энэ сарын 05-наас эхлэн 20-ныг хүртэл амаржих газрыг ариутгаж, угаалга цэвэрлэгээ хийсэн байгаа. Мөн Нийслэлийн мэргэжлийн хяналтын газраас хэд хэдэн нэмж биелүүлбэл зохих шаардлагуудыг тавьсан. Бид түүнийг нь биелүүлсэн.