УИХ-ын анхдугаар чуулганыг өнөөдөр 11.00, 15.00, 18.30, 19.00 цагаас дөрвөн удаа зарласан ч МАН-ын бүлгийн гишүүд чуулганы танхимд орж ирээгүй л байна. АН-ын бүлэг, “Шударга ёс” эвслийн бүлэг, ИЗНН-ын гишүүд, бие даагчид МАН-ын бүлгийн гишүүдийг хүлээсээр өдийг хүрч байгаа юм.

Харин эх сурвалжийн мэдээгээр МАН-ын бүлгийнхэн УИХ-ын даргад нэр дэвшигч З.Энхболдыг урьж уулзсан гэж байгаа бөгөөд тун удахгүй чуулганы нэгдсэн хуралдаан эхэлнэ гэж байна.

Өдөржин хуралдсан МАН-ын бүлгийн хурлаар сонгуульд хариуцлагагүй оролцсон гэх шалтгаанаар МАН-ын дарга С.Батболд, ерөнхий нарийн бичгийн дарга У.Хүрэлсүх нараас гадна Удирдах зөвлөлийн гишүүдээ бүрэн бүрэлдэхүүнээр нь огцруулах шийдвэр гаргажээ. Мөн Өвөрхангай аймагт УИХ-ын сонгуульд өрсөлдсөн Н.Төмөрхүүгийн бүрэн эрхийг зөвшөөрөх асуудлыг ч МАН-ын зүгээс АН-д тавьсан гэх мэдээлэл байна.

Ямар боловч чуулганы танхим дахь Ерөнхийлөгчийн ширээн дээр аягатай ус тавьж байгаа нь хуралдаан эхлэх дөхсөн болов уу гэсэн таамгийг төрүүлж байгаа юм.