Монгол Улсын Гадаад харилцааны сайд Г.Занданшатар манай улсад албан ёсны айлчлал хийж буй Израиль Улсын Гадаад хэргийн дэд сайд Даниел Аялоныг өнөөдөр хүлээж авч уулзаж, хоёр талын харилцаа болон харилцан сонирхсон асуудлаар санал солилцов.

Уулзалтын үеэр Гадаад харилцааны сайд Г.Занданшатар хоёр орны хооронд сүүлийн 20 жил тогтсон найрсаг харилцаа, хамтын ажиллагаанд сэтгэл хангалуун байгаагаа илэрхийлж, цаашид ч бататган хөгжүүлэхийн төлөө байгаагаа илэрхийлэв. Сэргээгдэх эрчим хүч, эрүүл мэнд, хөдөө аж ахуй, мэдээлэл технологийн болон бусад салбарт хамтын ажиллагааг идэвхжүүлэх боломж бололцоо байгааг хоёр тал тэмдэглэв гэж ГХЯ-ны Олон нийттэй харилцах газраас мэдээлэв.