“Лондон-2012” олимпийн наадам эхлэхийн өмнө Их Британийн гаалийн шалган нэвтрүүлэхийн ажилтнууд ажил хаялт зарлах гэж буй талаар Үйлдвэрчний эвлэлүүдийн удирдлага мэдэгдсэн байна. Хэрэв тэд ажил хаявал олимпийн зочдыг хүлээн авч эхэлсэн “Хитроу” нисэх онгоцны буудлын паспортын шалгалтын хэсэгт урт дараалал үүсэх юм. Их Британийн Үйлдвэрчний эвлэлүүд гишүүддээ энэ сарын 26-нд буюу олимпын наадмын нээлтийн ёслолын өмнөх өдөр ажил хаяхыг уриалжээ. Энэ удаагийн ажил хаялт нь Их Британид өдрөөс өдөрт нэмэгдэж буй ажилгүйдэл, бага цалин, өмч хувьчлалтай холбоотой удаан үргэлжилсэн маргаантай асуудлын үр дагавар аж. Энэ нь олимпийн наадмыг зохион байгуулагчдын хувьд том цохилт болно гэж ажиглагчид үзэж байна.

Тэд ийн олимпийн үеэр ажил хаялт зохион байгуулахаар шийдсэн нь санамсаргүй хэрэг биш аж. Учир нь тэд хэзээ ч зорьсон зорилгодоо хүрч байгаагүй юм. “Лондон-2012” олимпийн наадам долдугаар сарын 27-нд нээлтээ хийж, наймдугаар сарын 12-нд өндөрлөх бөгөөд залгуулаад хоёр долоо хоногийн дараа паралимпийн наадам эхлэх юм. Олимпийн зочид, тамирчид эхнээсээ Лондонд очоод байгаа билээ. Үйлдвэрчний эвлэлүүдийн дээрх мэдэгдлийг Их Британийн Цагаачлалын сайд “Цөөн хэдэн хувиа бодсон хүний гаргасан ухаангүй үйлдэл” гэж буруутгажээ. Үйлдвэрчний эвлэлүүдийн дээрх мэдэгдлийн дараа “Хитроу” болон бусад нисэх буудлын удирдлагууд сандарч эхэлсэн бөгөөд хэрэв ажил хаявал олимпийн арван мянган тамирчид, зочдыг хэрхэн хүлээж авах билээ гэж толгойгоо гашилгаж байгаа гэнэ. Хитроу нисэх онгоцны буудал урт дараалал үүсч, аюулгүй ажиллагаанд эрсдэл учрахаас сэргийлж, ирэх даваа гаригаас паспортын шалгалтын хэсгүүдэд орон тооны бус ажилчдыг ажиллуулахаар болсон байна. Нисэх онгоцны буудлын ажилчид ажил хаяна гэснээс болж Хитроу тэтгэвэртээ гарсан хуучин ажилчдаа эргүүлэн ажилд авахаар болсон гэнэ.