Гишүүн Ч.Сайханбилэг Дээд шүүхийн тайлбарыг иш татан “УИХ-ын даргыг сонгох асуудлаар зөвшилцөх бичгийг намуудад илгээснийг зөвшилцөх гэж үздэг” гээд анхдугаар чуулганыг үргэлжүллье гэсэн бол гишүүн С.Баярцогт хуралдаан даргалагч Д.Дэмбэрэлээс хурлаа үргэлжлүүлэхийг шаардан МАН-ын бүлгийн гишүүдийг дуудахыг шаардлаа. Мөн МАН-тай заавал зөвшилцөөд байх албагүй, МАН-ын бүлэг орж ирэхгүй ч хуралдаад явна гэж байлаа.

Хуралдаан даргалагч Д.Дэмбэрэл “Тийм тулгалт нэг их хол явахгүй байх аа” гээд хуулиа баримталж зөвшилцөл явуулахыг хүсч буйгаа хэллээ. Чуулганы танхимд энэ асуудлаар маргаан болж АН-ын бүлгийн гишүүд анхдугаар чуулганыг үргэлжлүүлэхийг хуралдаан даргалагчаас шаардаж байв.

АН-ын дарга Н.Алтанхуяг “Д.Дэмбэрэл дарга та МАН-ын гишүүний хувиар бус хамгийн ахмад настайн хувьд хуралдаан даргалж байгаа. МАН-ын бүлгийг дуудаж оруулах эрхтэй. МАН-ын бүлэг хэзээ орж ирэх вэ” гэхэд Д.Дэмбэрэл дарга МАН-ын бүлэг зөвшилцөх ёстой хэмээгээд УИХ-ын дарга сонгох асуудлаар зөвшилцөөнийг үргэлжлүлэхээр болж хуралдааныг завсарлуулав.

Хуралдаан хэзээ эхлэх нь тодорхойгүй үлдлээ.