Их Британийн Дерби хотод олимпийн бэлтгэлээ базааж байсан Австралийн бадминтоны гурван тамирчин лхагва гаригт хоолны хордлогод орсон байна. Эрэгтэйчүүдийн хосын төрөлд тоглох Росс Смит, Гленн Уорф болон эмэгтэйчүүдийн багийн тамирчин Ренюга Виран нар үүний улмаас Их Британийн багтай хийх хамтарсан бэлтгэлдээ очиж чадсангүй.

Австралийн бадминтоны багийн дасгалжуулагч Лассе Бундгард “Эмч нар тэднийг эмнэлэгт авчирч шинжилгээ хийсний дараа хоолноос хордсон болохыг баталсан. Иймээс өнөөдрийн бэлтгэлийг өнжих боллоо. Гэхдээ тэднийг маргаашаас бэлтгэлээ хийнэ гэдэгт найдаж байна” гэв.

Болсон хэрэг явдлын талаар “Лондон-2012” зуны олимпийн XXX наадмын зохион байгуулах хорооноос “Австралийн бадминтоны багийн байрлаж буй газар нь наадмын албан ёсны бэлтгэлийн бааз биш” гэжээ.