БНХАУ-ын нэрт хөнгөн атлетикч, 110 метрийн халхалттай гүйлтийн олимп, дэлхийн аварга Лиу Сиан Лондонд тэмцээнээ тулгаж очих нь ээ. Их Британийн нийслэл хүйтэн, чийглэг уур амьсгалтай тул супер од Германы Леверкузен хотод бэлтгэл сургуулилалтаа үргэлжлүүлэх болсныг түүний дасгалжуулагч Сүн Хайпин мэдэгдлээ. Тэрбээр нэмж “Лиу Сиан наймдугаар сарын эхэн хүртэл олимпийн тосгонд очихгүй” гэж “Сhina Daily” –д ярьсан байна.

“Шар сум” булчингийн бэртлийн улмаас “Алмаазан лиг”-ийг өнжиж, Леверкузенг зориод байгаа билээ. Тэрбээр “Афин-2004”-т түрүүлсэн ч “Бээжин-2008”-д бэртлийн улмаас хүссэн амжилтаа гаргаж чадаагүй билээ.