-"3 бүдүүн" хамтлагийнхан зуныг юу хийж өнгөрөөж байна даа?

-Одоогоор амралт ажил хоёроо зэрэгцүүлээд явж байна. Амраад, хажуугаар нь гурав дахь цомгийн ажлаа хийж байна. Манай хамтлагийн гурав дахь цомгийн ажил дуусах шатандаа явж байгаа. Нийтдээ 10 гаруй дуу хийж байгаагаас гурав нь үлдсэн байсан. Тэрнийгээ дуусгаад хэвлэлтэд явуулах гээд байж байна даа. Цомогт "Магнат үсэгтэй туг" зэрэг сүүлд гаргасан уран бүтээл болоод хайрын, уянгын бүх төрлийн дуу багтаж байгаа.

-Шинэ цомог хэзээ бэлэн болох бол?

-Цомгоо хэвлэлтэд явуулах л үлдсэн. Ирэх наймдугаар сарын сүүлчээр хүмүүсийн гар дээр очих байх гэж бодож байна. Манай хамтлагийнхан өмнө нь цомог гаргаад, реклам сурталчилгаа хийж өдөрлөг зохиож байгаагүй. Энэ удаагийн цомгоо гаргасны дараа өдөрлөг зохион байгуулах болно.

-Ээжийн тухай нэг сайхан уран бүтээл гаргасан байсан?

-"Монгол ээж" гэж дуу гаргасан. Тэр дууныхаа клипэнд 21 сайхан ээжийг тоглуулъя гэж төлөвлөөд байна; Хэний ч ээж байж болно. Заавал дарга цэргийн гэхгүй хэн хүссэн нь ээжийгээ баярлуулан мөнхжүүлэхээр клипэнд маань тоглуулж болно. Ээжийгээ клипэнд мөнхжүүлэхийг хүссэн сонсогчид баяртай жаргалтай үеэ бичүүлж болно. Ээжтэйгээ хамт дахин давтагдашгүй үеэ мөнхжүүлэхийг хүссэн хэний ч өмнө нээлттэй.

-Ээжийгээ клипэнд тоглуулахыг хүссэн хүмүүс хаана яаж хандах уу?

-Одоогоор энэ тухай яаж зарлахаа төлөвлөөгүй байна. Яриа төдий л байгаа. Гэхдээ удахгүй сонин, телевизээр гаргах байх аа. Хүссэн хүмүүс бидэнтэй холбогдоод уулзаад ээжийгээ оруулж болно. Одоогоор найз нөхдийн гэх мэт арваад ээжийг оруулахаар болчихсон. Зарласны дараа клипэнд тоглох хүсэлтэй ээжүүд зөндөө гарах байх. Тэгэхээр тодорхой хэмжээний шалгуур, бага зэргийн төлбөр авах болов уу. Гэхдээ төлбөр гээд нэг их сүртэй зүйл биш. Түрүүлж бидэнтэй холбогдсон ээжийг тоглуулна.

-"3 бүдүүн" хамтлагийнхан СТА болсноо яаж тэмдэглэх гэж байна?

-СТА цол тэмдгээр шагнуулснаасаа хойш янз бүрийн үйл ажиллагаа зохиогоогүй. Тэгэхээр ирэх сард цомгийн баяр мөн цолны найр маягийн арга хэмжээ зохиохоор төлөвлөсөн. Тэгэхээр үүнтэй давхцаад шинэ клипүүдээ гаргая гээд давхар давхар төлөвлөгөө гаргачихаад байна.

-Ирэх жилийн "Мартын 8"-нд тоглолт хийнэ гэсэн сураг гараад байсан, юу болж байна?

-Одоогоор бид "Монгол ээж" дууныхаа клипэнд нэлээд анхаарал хандуулж шинэлэг сайхан зүйл хийхийг зорьж байна. Ирэх жилийн "Мартын 8"-нд "Монгол ээж" нэртэй тоглолт хийж магадгүй. Ярьж байгаа болохоос нарийн төлөвлөөгүй байгаа шүү. Удахгүй хийх цомгийн баяр, СТА цолны найранд манай хамтлагийг сонсох дуртай хүмүүс ирэх боломжтой учраас багахан хэмжээний тоглолт болно л доо. Бусад хамтлаг дуучид цомгийн баяр гэхээр найз нөхөд уран бүтээлчдээ цуглуулаад өнгөрдөг. Манайх болохоор фэнүүдээ ч гэсэн урих болно.

-Наадмаар юу хийж өнгөрүүлэв?

-Наадмаар Булган аймагт очин дуулж булганчуудтай нэг үдшийг өнгөрөөлөө. Нутгийнхан сайхан хүлээж авсан болохоор их эрч хүч авлаа.