Монгол Улсын Хөдөлмөрийн баатар, Гавьяат тамирчин, Бээжингийн олимпийн мөнгөн медальт, дэлхийн аварга П.Сэрдамба, Гавьяат тамирчин Н.Төгсцогт, У.Мөнх-Эрдэнэ, ОУХМ Б.Түвшинбат нарын дөрвөн тамирчнаа Лондонгийн олимпийн рингэнд сойх эрхтэй болсон боксынхон өнөөдөр Будант Албьоны нийслэл Лондон хотыг зорилоо. Зуны XXX олимпийн наадам найм хоногийн дараа нээлтээ хийнэ. Харин боксын тэмцээн нээлтийн маргааш өдөр буюу 28-наас эхэлж, наймдугаар сарын 12-нд сүүлийн медальтнууд тодрох юм.

Олимпийн рингэнд тулалдах Монголын боксчдын тухайд П.Сэрдамба хамгийн хөнгөн жин болох 49 кг-д, Н.Төгсцогт 52 кг-д, У.Мөнх-Эрдэнэ 64 кг, харин Б.Түвшинбат 69 кг-ын жинд тоглох билээ.

Олимпийн хөтөлбөрийн дагуу боксын тэмцээн 56 ба 75 кг-ын жингийн тоглолтоор эхэлнэ. Харин Монголын ширэн бээлийтнүүдийн салхийг хагалж, долдугаар сарын 29-нд ОУХМ Б.Түвшинбат Лондонгийн рингэнд гарна. Залгуулаад 30-нд Н.Төгсцогт, харин П.Сэрдамба, У.Мөнх-Эрдэнэ нар 31-нд эхний тулаанаа хийх юм.