Сүүлийн жилд  Хятадын цэргийн зардал 11,5  хувиар өсөн 2012 онд 104,62 тэрбум ам.доллар болсон тухай ICD Research компанийн судалгаанд өгүүлжээ. Ойрын таван жилдээ Хятадын цэргийн зардал өсөн 2017 онд 174,9 тэрбум ам.доллар хүрэх хандлагатай ажээ. Ойрын таван жилд Хятад шинэ зэр зэвсэг худалдан авах болон зэвсэглээ сайжруулан шинэчлэхэд нийтдээ 722,4 тэрбум доллар зарцуулах ажээ. Хятад цэргийн технологийн импортыг ихээхэн сонирхох болно гэж мэргэжилтнүүд үзэж байна.

2012 оны гуравдугаар сард Хятадын Коммунист намын Төв хорооны гишүүн Ли Жаосин энэ жилд Хятадын цэргийн төсөв 11,2 хувиар өсөн 670,72 юань болно гэж мэдэгдсэн билээ.

Өнгөрсөн онд Хятадын цэргийн зардал нь өмнөх оныхоос 12,7 хувиар нэмэгдэн 601 тэрбум юань болсон байв. Энэ жилийн хоёрдугаар сард IHS Global Insight компани дүгнэлтээ шинэчлэн 2011-2015 онуудад Хятадын цэргийн зардал хоёр дахин нэмэгдэн Ази, Номхон далайн бүсийн бүх орнуудын цэргийн нийт зардлаас давна гэсэн байлаа.