Канцлерийн суудлын төлөөх тэм­цэлд Ангела Меркелийн (Angela Mer­kel) оролцох нь улам бүр тодорхой болж байна. Канцлер өөрөө Европын ирээ­дүй уриан дор явагдах бундестагийн сон­гуульд Христийн ардчилсан намаас нэр дэвшин канцлерийн суудлын төлөө гурав дахь удаа өрсөлдөхөө ярилцлагадаа дурджээ. ZDF телевизид ярилцлага өгөхдөө хөтлөгчийн тавьсан нэрээ гурав дахь удаагаа дэвшүүлэх үү гэсэн асуултад  тэрбээр энэ ажил өөрт нь ихэд  таалагддаг гээд “энэ асуултад өмнө нь хариулж байсан учраас дандаа давтаад байх нь утгагүй” гэв. Өнгөрсөн жилийн арваннэгдүгээр сард ийм асуултад хариулт өгөн “бүтээж байх нь сөрөг хүчин байхаас илүүтэй таалагддаг” гэж канцлер хэлсэн билээ.

Ирэх сонгуулийн гол сэдэв нь Ев­ропын хувь заяа болох тухай канцлер хэлэв. Христийн ардчилсан холбоо нь Европын чиглэлийг тууштай барьж, Европын холбооны оршин тогтнолоос өгч байгаа давуу талд анхаарах болно гэж Меркель онцлов. “Европгүйгээр бид манай хамтын үнэт зүйл, бидний үзэл санаа, бидний төсөөлөл байхгүй” хэмээн тэр хэлсэн байв. Энэ дашрамд тэрээр өөрийн эвслийн түнш Христийн нийгмийн холбооны тэргүүн Хорст Зеехоферийн (Horst Seehofer) хэлсэн “хэрэв Грек зээлдэгч нарынхаа өмнө авсан үүргээ биелүүлэхгүй бол евро бүсийг орхих хэрэгтэй” гэсэн үгийг дэмжсэнгүй.

Ангела Меркель “үүргээ биелүүлэх нь чухал” гэдгийг хүлээн зөвшөөрсөн ч Грекийг евро бүсээс гаргах талаар нь Европын холбоо, Европын төв банк ба ОУВС гуравын тайлан гартал тайлбар хийхгүй гэлээ.

Үүний өмнө Rheinische Post сонин Германы Засгийн газрын эх сурвалжаас иш татан “гурвалын” байцаагчдын хийсэн Грекийн амлалтаа хэрхэн биелүүлж буй талаарх урьдчилсан тайланд хэмнэлтийн тохиролцсон 300 заалтынхаа 210-ыг Грек биелүүлж чадаагүй гэсэн хэмээн өгүүлсэн байна.