Дэлхийн супер од, реппэр, хөгжмийн зохиолч, продюсер Питбуллийн гайхамшигт хит дуунууд долдугаар сарын 21-нд Улаанбаатар хотын Төв цэнгэлдэх хүрээлэнд эгшиглэхээр товлогдоод байсан билээ. Гэвч түүний ар гэрт асуудал үүссэн учраас тэрбээр энэ сард хийхээр товлоод байсан хэд хэдэн тоглолтоо хойшлуулахад хүрсэн байна. Үүнд, Испани, Швейцарь, Монгол дахь тоглолтууд багтжээ. Тодруулбал, Улаанбаатар хотноо хийх тоглолтын товыг нэг сар гаруй хугацаагаар хойшлуулж, ирэх есдүгээр сарын 8-нд хийхээр болсон байна. Энэ тухай алдарт реппэр Pitbull өөрөө дүрс бичлэгээр мэдээлэх тухай түүний Монгол дахь тоглолтыг зохион байгуулагчид хэлж байна. Тоглолтын тасалбар худалдан авсан үзэгчдийн тухайд санаа зовинох зүйлгүй, тоглолтын тов хойшилсон болохоос цуцлагдаагүй, тиймээс өмнөх тасалбар хүчинтэй гэдгийг мөн дуулгав.

Түүнчлэн зохион байгуулагчдын зүгээс Pitbull-ын тоглолтын дуу, хөгжим, техникийн асуудлыг хэдийнэ бэлтгэн, бэлтгэл ажил дууссан талаар мэдээлсэн юм. Хэдий цаг хугацааны хувьд хойшилсон ч Pitbull Монголд ирж, амьд хөгжмийн хэмнэл дор хамгийн сүүлийн үеийн дэвшилтэт технологи, төхөөрөмжүүдийг ашигласан 3D тайзнаас хамгийн хүчтэй хөгжмийн дуугаралт, лазер шоуны гайхамшгийг мэдрүүлэх нь ээ.