Баяр наадмын өдрүүдэд олон нийтээр амарч, өчигдрөөс энгийн цагийн хуваарийн дагуу ажиллах болсон. Гэтэл Монголын хөрөнгийн бирж өчигдөр арилжаа хийсэнгүй. Энэ талаар Монголын хөрөнгийн биржийн Арилжааны албанаас тодруулахад, “Өчигдрийн хувьд арилжааны үйл ажиллагаа хийсэн ч хувьцаа худалдан авах санал ирээгүй учир өдрийн дүн мэдээ гараагүй. Үүний шалтгаан нь шинэ систем нэвтэрч буйтай холбоотойгоор брокерийн компаниуд багассан, баяр наадмын өдрүүд дуусаагүй болоод ч тэр юм уу, хувьцааны санал ирэхгүй байлаа” хэмээн тайлбарлалаа.

Лондонгийн хөрөнгийн биржийн арилжааны систем болох “Миллениум Ай Ти”-г Монголын хөрөнгийн биржид нэвтрүүлэх туршилтын ажил амжилттай болсон тул бүрэн байдлаар нэвтрүүлэхээр болсон билээ. Харин энэхүү шинэ систем араасаа олон бэрхшээл дагуулсан талаар хэвлэл мэдээллийн хэрэгслээр мэдээллсээр байгаа. Үүний шууд тусгал нь өдөрт хэдэн сая ширхэг хувьцаа арилждаг байснаа больж, цөөхөн хэдэн компани арилжаанд оролцдог болжээ. Учир нь брокерийн компаниудад тавих шаардлага нь хатуу болсон хэмээж буй. Монголын хөрөнгийн биржийн арилжаа урд нь 11.00-13.00 цагийн хооронд явагддаг байсан бол Санхүүгийн зохицуулах хорооноос гаргасан шийдвэрийн дагуу долдугаар сарын 2-ноос 10.00-13.00 цаг хүртэл арилжаа хийж байгаа юм байна. Одоогоор “Миллениум Ай Ти” системийн шаардлагыг хангасан 12 брокерийн компани арилжаанд оролцож буй ажээ.