Буриад үндэстний “Алтаргана” их наадам долдугаар сарын 20-22-нд ОХУ-ын Агын Буриадад болно. Тус наадмыг 1994 оноос эхлэн хоёр жил тутамд зохион байгуулах болсон бөгөөд 2002 онд анх удаа хил дамнан Агын Буриадад болж байсан түүхтэй юм. Харин ес дэх удаагаа буюу 2010 онд Улаанбаатар хотноо болж байсан “Алтаргана” их наадам энэ жил Агын Буриадад дахин буудаллах нь ээ. 

“Алтаргана” наадамд Монгол орны өнцөг булан бүрт амьдарч байгаа 600 гаруй Буриад үндэстэн оролцох аж. Тус наадмыг БСШУЯ, Орос-Монголын нийгэмлэг, “Монголын Буриадын сан” холбоо зэрэг олон байгууллага хамтран зохион байгуулдаг ба нийт 21 номинациар шилдгээ тодруулах юм. Тус наадамд “Нюанс” хамтлаг урилгаар очиж, дуулах юм байна. Анх Хэнтий аймагт Буриад дууны уралдаанаар гараагаа эхэлж байсан тус наадам өдгөө Буриад үндэстний хэмжээнд хүсэн хүлээдэг томоохон наадам болтлоо хүрээгээ тэлжээ.