Дяоюйдао буюу Сэнкаку хэмээх маргаантай арлаас болж Япон улс өчигдөр БНХАУ дахь Элчин сайд Уичиро Ниваг татсан талаар тус улсын “Кёодо Ньюс” агентлаг мэдээллээ. Үүнээс хоёр хоногийн өмнө тус арал дээр Хятадын цэргийн гурван хөлөг онгоц ирсэнтэй холбогдуулан Япон улс эсэргүүцлээ илэрхийлсэн юм. БНХАУ-ын Гадаад харилцааны сайд Ян Цзечи үүний хариуд “Эдгээр арал бол угаасаа Хятадын газар нутаг” хэмээн мэдэгдсэн байна.

Япон улсаас БНХАУ-д суугаа Элчин сайд Уичиро Нива Гадаад харилцааны сайд Коичиро Гэнбатай уулзаж, арлын эргэн тойронд үүссэн нөхцөл байдлыг хэлэлцэх төлөвтэй байна. Тэрбээр Бээжинд эргэж ирэх нь ч тодорхойгүй байгаа аж.

Дяоюйдао буюу Сэнкаку арал нь БНХАУ, Японы маргаантай газар нутагт ордог юм. Япон улс тус арлыг 1895 оноос эзэмшсэн гэж үздэг бол БНХАУ-ын зүгээс Дяоюйдаог 1783, 1785 оны Японы газрын зурагт Хятадын газар нутаг хэмээн заасан гэж сануулдаг. Дэлхийн хоёрдугаар дайны дараа тус арал АНУ-ын хяналтад байсан ч 1972 онд Японд шилжүүлжээ. Харин Тайвань болон эх газрын Хятад энэ арлыг япончууд хууль бусаар эзэмшиж байна гэж үздэг аж.