Хүчит бөхийн барилдааны гурвын даваа үргэлжилж байна. Энэ давааны эхэнд Улсын харцага Т.Мөнгөнцоож Дорноговь аймгийн арслан Ё.Эрдэнэжаргалд өвдөг шорооджээ. Харцага ингэж хоёр дараалан дор даваанд унаж байгаа юм. Өнгөрсөн жил нутгийн аймгийн заан В.Мишигдоржид унаж байсан. Түүнчлэн энэ наадамд дээгүүр барилдах бөхчүүдийн нэг хэмээгдэж байсан улсын харцага А.Бямбажав Завхан аймгийн начин Ж.Оргилд өвдөг шороодоод байна.

Гурвын даваанд улсын харцага Г.Элбэг улсын начин Б.Сумъяаг, улсын харцага Л.Пүрэвжав улсын начин Б.Адьяахүүг, Ц.Содномдорж аймгийн арслан Ж.Наранбаатарыг, Д.Батболд Д.Цэрэндавааг тус тус амлан хүч үзэж байна. А.Цацабшир аймгийн арслан Б.Баатарцолыг, Т.Өсөх-Ирээдүй аймгийн арслан Ж.Сүхбатыг, аймгийн арслан Ш.Мөнгөнбаатар улсын начин Б.Чинзоригийг тус тус даваад байна.