Цагдаа, түргэн тусламж болон онцгой байдлын шуурхай бүлэг наадмын өдрүүдэд бэлэн байдалд ажилладаг. Нийслэлийн шуурхай албанд одоогоор ноцтой дуудлага ирээгүй бөгөөд зарим газар тог тасарч байна гэсэн дуудлагууд ирсэн байна. Тухайлбал, Баянхошууны баруун салаанд тог тасраад байна гэх дуудлага ирснийг мэргэжлийн хүмүүс засварласан байна. Мөн Төв цэнгэлдэх хүрээлэнд ажиллаж буй цагдаагийн албанд бага насны гурван хүүхэд  төөрсөн дуудлагын дагуу шуурхай ажиллаж, эцэг эхэд нь хүлээлгэн өгсөн гэлээ. Эцэг эхчүүд бага насны хүүхдээ олон хүнтэй газар авч явахдаа анхааралтай явахыг Цагдаагийн байгууллагаас анхааруулж байна. Төв цэнгэлдэх хүрээлэнд яаралтай түргэн тусламж, нийслэлийн Онцгой байдал болон цагдаагийн байгууллагын шуурхай бүлэг ажиллаж байгаа аж.