Дэлхийн оюутны аварга шалгаруулах байт харвааны IX тэмцээн Испани улсын Кордова хотын Монте Кронос их сургуулийн цэнгэлдэх хүрээлэнд долдугаар сарын 4-7-нд болж, 26 орны 150 гаруй тамирчин онч мэргэнээ сорьж, өрсөлдлөө.

Монголын оюутны байт харвааны шигшээ багийн тамирчдыг Монголын оюутны спортын холбоо, Монголын байт харвааны холбооноос (МБХХ) бэлтгэн оролцууллаа. Багийн бүрэлдэхүүнд ахлагчаар МБХХ-ны нарийн бичиг Б.Цэцгээ, дасгалжуулагч ОУХМ Ж.Нарантуяа, спортын мастер /СМ/ Т.Цогтбаяр нар, эмэгтэй тамирчидаас МУБИС-ийн оюутан СМ Б.Аззаяа, ҮБТДС-ийн оюутан СМ А.Энхтуяа, ҮБТДС-ийн оюутан СДМ Г.Одмаа, эрэгтэйчүүдээс ҮБТДС-ийн оюутан СДМ Б.Мөнхтогтох, Газарчин ДС-ийн оюутан СМ Ж.Мөнхтулга, ШУТИС-ийн оюутан СДМ Б.Нармандах нарын бүрэлдэхүүнтэй амжилттай оролцоод ирлээ.

Манай тамирчдаас холимог хосын төрөлд өрсөлдсөн А.Энхтуяа, Б.Нармандах нар өөрийн зайд 1239 оноо авч шигшээ харваанд шалгарсан юм. Тэд 1/8 шигшээ харваанд АНУ-ын хүчтэй баг болох К.Александр, А.Дон нарыг 11:6 харьцаагаар илүүрхэн ялсан байна. Цаашид 1/4 шигшээд шалгаран энэ тэмцээний аварга болсон БНСУ-ын харваачидтай оноолт таарч 7:14 оноогоор хожигдол хүлээжээ. Манай холимог хосын эдгээр тамирчид ийнхүү тус тэмцээний шагналт зургадугаар байрыг Франц, Тайваны дэлхийд алдартай баг тамирчдын хамтаар эзлэсэн байна. Энэ төрөлд БНСУ-ын баг алтан медаль хүртэн, Польш, Испанийн баг хоёр ба гуравдугаар байрт шалгарчээ.

Дэлхийн оюутны аварга шалгаруулах байт харвааны 10 дугаар тэмцээн 2014 онд Бельги улсын Лувайн хотноо зохиогдохоор болж олон улсын оюутны спортын холбооны тугаа хүндэтгэлтэйгээр хүлээн авчээ. Харин 11 дэх удаагийн тэмцээн 2016 онд Монгол Улсын нийслэл Улаанбаатар хотноо болох юм.