Хүн гүрний түүхийг бишрүүлсэн “Тэнгэрийн хүү” үндэсний түүхэн жүжгийг баяр наадмын тохиолдуулан УДЭТ-ын хамт олон үзэгчдийн хүртээл болгож байгаа билээ. Өнгөрсөн амралтын өдрүүдэд тайзнаа заларсан эл жүжгийг маргааш 18.00 цагт драмын тайзнаа дахин нэг удаа тоглох гэж байна. Тоглолтын тасалбар суудлын зэрэглэлээсээ хамааран 10, 15, 20 мянган төгрөгийн үнэтэй юм байгаа юм.

“Тэнгэрийн хүү” түүхэн жүжгийн найруулагчаар Соёлын тэргүүний ажилтан Н.Наранбаатар, ерөнхий зураачаар Соёлын тэргүүний ажилтан Т.Ганхуяг, хөгжмийн зохиолчоор Урлагийн гавьяат зүтгэлтэн Т.Сэр-Од, ассистент найруулагчаар Соёлтын тэрүүний ажилтан Ч.Түвшин, конструктор зураачаар Т.Түмэн-Өлзий, компьютер графикаар Т.Аянга, гэрлийн найруулагчаар Соёлын тэргүүний ажилтан Ц.Эрдэнэбат, жүжиг чимэглэлийн эрхлэгч Соёлын тэргүүний ажилтан Н.Батбилэг нар ажилласан юм. Харин жүжгийн гол дүр буюу Модун Шаньюйд жүжигчин Г.Эрдэнбилэг, Түмэн Шаньюйд Б.Жаргалсайхан, Түмэн Шанюйн их хатанд Н.Сувд, бага хатанд У.Уранчимэг, Арваадай хунтайжид С.Ариунбямба, Лүүсүү ванд П.Цэрэндагва нарын авъяаслаг жүжигчид болон УДЭТ-ын уран бүтээлчид бүрэн бүрэлдэхүүнээ оролцож, тоглосон юм.  Мөн “Тэнгэрийн хүү” жүжиг “Гэгээн муза” наадмаас зургаан номинацийын эзэн болж, өнгөрсөн оны хамгийн шилдэг бүтээлд олгосон гран-при шагналыг хүртсэн юм.