Цагдаагийн байгууллага жил бүрийн наадмаар сэтгүүлчидтэй хамтран ажилладаг уламжлалтай. Энэ дагуу хэвлэл мэдээллийн байгууллагын удирдлагуудын төлөөллийг хүлээн авч уулзан  санал бодлоо солилцсон юм.  Энэ үеэр Засгийн газрын хэвлэл мэдээллийн албаны дарга, Үндэсний баяр наадмыг тэмдэглэх хорооны хэвлэл мэдээллийн салбар хорооны дарга М.Оюунчимэгээс цөөн асуултыг тодрууллаа.

-Баяр наадмыг хичнээн сэтгүүлч сурвалжлах вэ?

-Энэ жилийн баяр наадмыг өнөөдрийн байдлаар хэвлэл, мэдээллийн 53 байгууллагын 820 гаруй ажилтан сурвалжлах хүсэлт ирүүлсэн. Харин ногоон талбайн сурвалжлагыг хийх хүсэлт 130-аад сэтгүүлчээс ирсэн. Гэвч өнгөрсөн жилийн жишгээр 90-ээд сэтгүүлчийг оруулна.

-Наадмыг аль телевизүүд шууд дамжуулах вэ?

-Баяр наадмыг шууд дамжуулах эрхийг нийт долоон телевизэд өгсөн. Тодруулбал,  “МҮОНРТ”, “Монгол телевиз”, “MN25”, “ТВ9”, “ТВ5”, “UBS”, “ETV” телевизүүдэд юм. Хүүхдийн бөхийн барилдааныг “ЗА” телевиз шууд дамжуулна.

-Бөхийн барилдаан, хурдан морь тайлбарлагчид сургалтад сууж байгаа гэсэн?

-Хурдан морь болон бөхийн барилдааныг тайлбарлагчдад анхаарал хандуулах хэрэгтэй гэдгийг иргэд ихээр хэлдэг. Энэ жилийн наадмыг Монгол ёс заншил, морины зүсийг маш сайн мэддэг хүмүүс тайлбарлахаар болсон. Мөн Бөхийн хорооноос тайлбарлагчдад зориулсан сургалт зохиож байгаа.