Өмнөд Африкийн хөнгөн атлетикч, “Илдэн дээр гүйгч” гэгдэх Оскар Писториус олимпийн наадмын талбарт өрсөлдөх мөрөөдлөө биелүүлэх боломжтой боллоо. Бүхий л амьдралынхаа туршид тахир дутуу байсан тэрбээр паралимпийн наадмаас дөрвөн алтан медаль зүүсэн нэгэн. Харин одоо тэр хүсэл мөрөөдлөө биелүүлж, Лондонгийн олимпийн наадамд хөнгөн атлетикийн 400 метрийн ганцаарчилсан болон 4х400 метрийн буухиа гүйлтэд оролцох эрхтэй болсон байна.

Олимпийн “А” норматив хангаснаар Лондонд хурд сорих болзол хангасан түүнийг эх орноо төлөөлөн оролцох боломжийг Өмнөд Африкийн хөнгөн атлетикийн холбоо эцсийн мөчид шийдвэр гаргаж, олгожээ.

11 сартайдаа өвчний улмаас хоёр хөлөө тайруулсан Оскар Писториус карбон фибр материалаар хийсэн тусгай хиймэл хөлийн тусламжтай хөнгөн атлетикийн спортод цойлох болсон юм. Тиймээс ч “Илдэн дээр гүйгч” гэх хочтой болсон билээ. Тэрбээр ийнхүү олимпийн наадмын хөнгөн атлетикийн төрөлд оролцож буй анхны пара тамирчин болж буй ажээ.