Монгол Улсын Ерөнхий Прокурор Д.Дорлигжав тэргүүтэй төлөөлөгчид “Эдийн засаг тогтвортой хөгжлийн эрх зүйн орчинг баталгаажуулах” төслийн шугамаар ХБНГУ-д хийсэн албан айлчлал өндөрлөлөө. Уг айлчлалаар Монгол Улсын Ерөнхий Прокурор Д.Дорлигжав,УЕП-ын туслах Тамгын хэлтсийн дарга Б.Үнэнбат, Монгол улсаас ХБНГУ-д суугаа Элчин сайд Б.Даваадорж нарыг Холбооны Улсын Прокурор Ноён Др.Ханс Юрген Фойрстер, Ерөнхий прокурорын байнгын орлогч, газрын дарга Райнар Гриесбаум, Холбооны улсын Хууль зүйн сайдын зөвлөх, Эрүүгийн эрх зүйн газрын дарга Томас Дитман зэрэг албаны хүмүүс хүлээн авч уулзан санал бодлоо солилцсон байна.Мөн айлчлалын хүрээнд төлөөлөгчид Бавари Муж улсын Ерөнхий Прокурорын Газар, Мюнхен хот дахь Шүүх эрх мэдлийн байгууллагын Эрүүгийн хэргийн төв, Мюнхен хотын Цагдаагийн Ерөнхий Газар, Пегниц хот дахь Муж улсын Хуулийн дунд сургууль, Муж улсын Хууль зүй ба Хэрэглэгчдийн эрх ашгийг хамгаалах яам, Бавари мужийн Шүүх эрх мэдлийн байгууллагуудын мэдээллийн технологийн нэгдсэн төв Ландесхут хот дах хорих анги зэрэг байгууллагуудын үйл ажиллагаатай танилцжээ. Энэ үеэр Бавари муж улсын Ерөнхий прокурор Др.Кристоф Штройцтой уулзан, эрүүгийн хэргийг мөрдөн шалгах, хяналт тавих асуудлыг эрхэлсэн байгуулгуудын үйл ажиллагааг хэлэлцжээ гэж УЕПГ-ЫН Хэвлэл, мэдээллийн албанаас мэдээллээ.
