Монголын зорчигчдод Турк улс илүү “ойр” болж байна. Учир нь Туркийн иргэний агаарын тээврийн “Turkish airlines” авиа компани Монголд албан ёсны үйл ажиллагаагаа явуулж эхэлжээ. Ингэснээр манай улсаас Туркийн Истанбул хот руу шууд нислэг хийх боломжтой болж байгаа юм. Өмнө нь Турк руу Улаанбаатараас Москвагаар дайрч хүрдэг байсан. Тэгвэл Туркийн авиа компани үйл ажиллагаагаа явуулах болсноор Киргизстан улсаар дайрч, түлшээ сэлбэхийг эс тооцвал санасан газартаа саадгүй хүрэх бүрэн боломжтой болжээ. Өнөөдөр анхны нислэгээ хийсэн “Turkish airlines” компани долоо хоногийн гурван өдөр буюу мягмар, пүрэв, бямба гаригт нислэг үйлдэх ажээ.