“Газар олгох нь” гэсэн цуу ярианаас болж иргэд өчигдөр Яармагийн урд дэнжид олноороо цуглан, бужигналдсан билээ. Гэхдээ эл яриа нь ор үндэсгүй худал цуурхал болохыг иргэд Хан-Уул дүүргийн Газрын албаныханаас ойлгож мэдээд өөрсдийн сайн дураар буусан байна. Хан-Уул дүүргийн Засаг даргын Тамгын газар, Газрын албаныхантай утсаар холбогдож болж өнгөрсөн үйл явдлыг тодруулахад, “Иргэд өөрсдийн ухамсраар өчигдөр 21.00 цагаас эхлэн буусан. Үүнд цагдаа болон бусад холбогдох албаныхны шахалт шаардлага оролцоо байгаагүй” гэдэг тайлбар өглөө.

Хан-Уул дүүргийн дөрвөөс наймдугаар хорооны нутаг дэвсгэрийг дамнан үргэлжилдэг Яармагийн урд дэнж нь Тусгай хамгаалалттай газар нутагт харьяалагддаг байна. Тодруулж хэлбэл, эл газар нь Нийслэлийн Газрын албаны харьяанд бус Байгаль орчин, аялал жуулчлалын яаманд харьяалагддаг гэсэн үг. Тиймээс иргэдийн хувийн хэрэгцээнд шууд өгөх эрх зүйн зохицуулалтгүй аж. Бодит байдал ийм атал “Яармагийн дэнжид нэг иргэнд 0.07 га газар олгох гэж байна” хэмээн хэсэг бүлэг этгээд зохион байгуулалттайгаар цуу яриа тарааж олон нийтийг бужигнуулж, бухимдуулсан нь иргэдийн яриагаар батлагдаж байгаа тул энэ хэрэг явдлыг хууль хяналтын байгууллагынхан шалгаж, хэргийн эзнийг тогтоохоор ажиллаж буй юм байна.