Дотоод, гадаадын магадлан итгэмжлэгдсэн их, дээд сургуулиудын мэдээллийг нэг дор авах боломжтой “Шинэ элсэлт-Шилдэг боловсрол 2012” үзэсгэлэн яармаг өнөөдөр Улаанбаатар хотын Бизнес хөгжлийн төвд нээлтээ хийлээ. Үзэсгэлэн яармагийг БСШУЯ, “Модерн экспо” агентлаг хамтран зохион байгуулж буй бөгөөд энэ сарын 6-ныг хүртэл үргэлжлэх юм. Үзэсгэлэнд гадаад, дотоодын 30 гаруй их, дээд сургууль оролцож, элсэлтийн журам болон мэргэжилтэн бэлтгэх ангиудаа танилцуулж, элсэгчдээ бүртгэж байна. Тухайлбал, “Хүрээ”, “Цэцээ гүн”, “Түгээмэл”, “Глобал удирдагч”, “Соёмбо”, “Улаанбаатар Эрдэм-Оюу”, “Mongolian royal academy” ,“Raffles institiute”, “Газарчин” зэрэг дээд сургуулийн мэдээллийг авах боломжтой юм. Түүнчлэн бүх их, дээд сургуулийн оюутан элсүүлэх журам, ангиудын талаарх  гарын авлагыг тус үзэсгэлэнгээс 2000 төгрөгөөр худалдан авч болох ажээ.

Элсэлтийн ерөнхий шалгалтын дүн гарч, батламжаа гардан авч буй сурагчдын хувьд нэн хэрэгцээт уг үзэсгэлэн яармаг нь сурагчдыг сургуулиа сонгох сонголтод нь нэмэр болох зорилготой гэнэ.