Талбайн теннисний оны гурав дахь “Их дуулга” болох “Уимбльдон” Лондон хотноо үргэлжлэн явагдаж байна. Өчигдөр тэмцээний гуравдугаар тойргийн тоглолтуудаас дэлхийн тэргүүн теннисчин ОХУ-ын Мария Шарапова, Польшийн Радваньска (3), Германы Кербер (8), Мария Кирилленко (17), Белгийн Ким Клейстерс нарын шилдэгүүд дөрөвдүгээр тойрогт шалгарсан байна.

2008 онд "Австралийн нээлттэй тэмцээн"-ий шигшээд шалгарч улмаар Ролланд Гаррост түрүүлж дэлхийн тэргүүн теннисчин хэргэмийг хүртэж явсан Сербийн Анна Иваннович Германы Гергесийг 3:6, 6:3, 6:4-ийн харьцаагаар буулган авч дөрөвдүгээр тойрогт Беларусын Азаренка(2)-тай оноолт таарлаа. Өдгөө дэлхийн чансааны хоёрт эрэмбэлэгдэж буй Азаренка оны анхны "Их дуулга" болох "Австралийн нээлттэй тэмцээн"-нд түрүүлж дэлхийн тэргүүн теннисчин хэргэмийг хүртэж байсан тэрээр өнгөрсөн сард Францын нээлттэй тэмцээнд амжилт муутэй оролцож тэргүүн хэргэмээ ОХУ-ын Мария Шараповад алдсан билээ.

Дөрөвдүгээр тойрогт ОХУ-ын Мария Шарапова Германы Сабини Лициски (16), "Их дуулга"-ын дөрвөн түрүүт Белгийн Ким Клейстерс Германы Кербертэй оноолт таарчээ.

Эрэгтэйчүүдийн хувьд гуравдугаар тойргийн хамгийн сонирхолтой тоглолт Швейцарийн Рожер Федерер болон Францын Беннетто нарын хооронд өрнөжээ. Рожер хүндхэн тоглолтоос ялалтыг өөрийн болгосон байна. Тоглолтын эхний хоёр сэтийг 6:4, 7:6-аар Беннетто илүүрхэж авсан бол удаах гурван сетийг Рожер 6:2, 7:6, 6:1-ээр өөрийн болгосон. Энэхүү тоглолт гурван цаг 37 минут үргэлжилсэн байна. Харин Федерергийн дараагийн өрсөлдөгч дэлхийн чансааны 75-т эрэмбэлэгдэж буй Белгийн Малисс аж.

Дөрөвдүгээр тойрогт Испанийн Дэвид Феррер (7), 2009 оны Америкийн нээлттэй тэмцээний аварга Аргентиний Хуан Мартин Дель Потро (9), Их Британы тэргүүн теннисчин Энди Муррей (4) Хорватын Мэрин Чиличтэй (16) оноолт таарчээ.

Мөн Францын Жо Уильфред Цонга (5) Америкийн Мэрди Фиш (10)-тэй оноолт таарсан байна.