СЕХ сая мэдээлэл хийлээ. Өнөөдөр 16.00 цагийн байдлаар улсын хэмжээнд УИХ-ын сонгуульд санал өгч буй иргэдийн ирц 49,81 хувьтай байгааг мэдээллээ. Хамгийн өндөр ирцтэй тойргоор Завхан аймаг тодроод байна. Тус аймгийн сонгогчдын 64,92 хувь нь саналаа өгчээ. Нийслэлээс Баянгол дүүрэг хамгийн өндөр буюу 50,05 хувийн ирцтэй байна.

Гадаадад ажиллаж сурч буй иргэдийн нам, эвслийн төлөө өгсөн саналыг өнөө орой 20.00 цагаас хойш тоолох ажлын хэсгийг сая СЕХ хуралдан томилжээ. Сонгуулийн албан ёсны дүнг хэсэг, тойргийн хороод санал хураалтын дүнгээ нэгтгэж СЕХ-нд бүрэн ирүүлсний дараа гаргах аж.

Тойрог бүрээс хоёр хэсгийг сугалаагаар сонгож, хяналтын гар тооллого явуулахаар болсон. Саналын тоо зөрвөл машины тооллого, гар тооллогын алийг хүчинтэй хэмээн үзээх вэ гэсэн сэтгүүлчийн асуултад СЕХ-ны дарга Н.Лувсанжав хариулахдаа “Тооллогын машинд программын алдаа гарах нь бараг байхгүй. Туршилтын тооллого бол машины тооллогод итгэл үнэмшил үзүүлэх ач холбогдолтой. Нам, эвслүүдийн саналаар хяналтын тооллого явуулах журам гаргасан. Хяналтын тооллогыг хэсгийн санал хураалтын дүн гарсны дараа явуулна. Энэ бол машинд итгэл үзүүлэх зорилготой" гэлээ.

Мөн автомат машин гацсан хэсгүүдэд цаг сунгаж санал авах уу гэсэн асуултад Н.Лувсанжав дарга “Цаг сунгана гэсэн тийм ойлголт байхгүй” гэв. Зөрчлийн тухайд мөнгө тараасан гэх мэт ноцтой зөрчил байхгүй. Хэсгүүд гарсан зөрчлүүд дээр ажиллаж байгаа, тойргууд мөн зөрчил арилгах талаар ажиллах учиртай юм байна.

Машины кодыг буруу тайлах, машинаа буруу угсрах, Сүхбаатар аймагт сонгогч саналын хуудсаа нугалж хийснээс машин гацсан зэрэг тохиолдлууд гарчээ. 500 хуудас тутамд машины толгойг цэвэрлэх ёстой. Гэтэл дараалал их байгаагаас тэгж чадахгүй гацалт үүсч байгаа ажээ. Хөдөлгөөнт багийнхан гэмтэл согогийг цаг тухайд нь засч байгаа юм байна. Тангараг өргөсөн төрийн албан хаагчид хэсгүүд дээр ажиллаж байгаа. Тиймээс зөрчлийн тухай зарим асуудал худлаа байх гэсэн болгоомжлолыг СЕХ-ны дарга хэллээ.

МАХН-МҮАН-ын "Шударга ёс" эвслийн зарим нэр дэвшигчийг саналын хуудсан дээр буруу бичсэн байсан талаар эвслийн зүгээс хийсэн Хэвлэлийн бага хурал дээр мэдээлсэн Энэ талаар албан ёсоор СЕХ-нд ирсэн гомдол байхгүй аж. Саналын хуудас буруу хэвлэгдэх ёсгүй гэлээ. "Шударга ёс" эвслийнхэн өөрсдөө бүх саналын хуудсыг хянаж “үнэн зөв байна” гэж гарын үсэг зурсныг СЕХ-ны нарийн бичгийн дарга баталлаа.

Ажилтан, албан хаагчид нь сонгуулийн өдөр ажиллаж буй байгууллагууд санал өгөх боломжоор нь хангаж өгөх ёстой гэдгийг мөн тайлбарлав.

Чингэлтэй дүүрэгт урьдчилж бөглөсөн саналын хуудсууд оруулсан гэсэн мэдээлэл иржээ. Энэ мэт зөрчил байгаа эсэхийг лавласан сэтгүүлчийн асуултад одоогоор СЕХ-нд ирүүлсэн ноцтой зөрчлийн талаарх мэдээлэл байхгүй гэлээ. Чингэлтэй дүүрэгт гарсан зөрчлийг неон гэрлээ шалгахад хуудас хүчинтэй байсан. Гагцхүү хэмжээнд мм-ийн алдаа байсан. Нууцлал усан хээ, машины код, бар кодууд тохирсон гэж гарсан тул ашиглах боломжтой гэжээ. Зарим тойрогт гарсан зөрчлийг тэмдэглэж аваад СЕХ нягтлахаар боллоо.

Өмнөх сонгультай харьцуулахад ирц буурсан байна. Өмнө нь хурууны хээ авдаггүй, машинд уншуулдаггүй байсан. Өмнөх сонгуульд 17.00 цагт 57 хувьтай байжээ. Энэ удаа санал авч дуусах цаг наашилсан тул ирцийн байдлыг мөн нэг цагаар наашлуулж зарлаж байгаа нь ирцийн мэдээнд нөлөөлж буйг бас хэллээ.

Олон хэсэгт хаяг дээр хүн нэмэгдэж бичигдсэн зөрчил гарч байгаа, тэр хүмүүс нь саналаа өгөөд явчихсан, ажиглагчийг босгодоггүй, санал хураах үйл явцыг ойроос харуулдаггүй гэх зэрэг зөрчил гарч байгааг сэтгүүлчид сануулж байв. Харин үүнд СЕХ-ны даргын зүгээс “УБЕГ нэг хүн хоёр удаа санал өгөх ямар ч боломжгүй гэдгийг баталсан” гэж байлаа.

20.00 цагаас СЕХ-ны байранд гадаадад байгаа иргэдийн саналын хуудсыг тоолох үйл ажиллагаа болно гэлээ. Дараагийн мэдээллийг 21.00 цагаас өгөхөөр болов.

УИХ-ын сонгуулийн ирц /16.00 цагийн байдлаар/:

№	Аймаг, дүүрэг	Сонгогчдын тоо	Санал өгсөн байдал		Ирц /хувиар/
			11.00 цагт	16.00 цагт	11.00	16.00
1	Архангай	57065	9049	30421	15,8	52,77
2	Баян-Өлгий	53454	9621	25230	18	47.2
3	Баянхонгор	51446	11463	30670	22,3	59.15
4	Булган	38172	6993	20165	18,3	52.83
5	Говь-Алтай	33915	8396	20219	24,75	59,62
6	Дорноговь, Говьсүмбэр	48576	9621	23799	19,8	49,02
7	Дорнод	50155	8966	24570	17,87	48,99
8	Дундговь	28815	6785	15543	23,54	53,92
9	Завхан	44450	10575	28857	23,79	64,92
10	Өвөрхангай	71882	12657	39171	17,6	54,49
11	Өмнөговь	37682	8631	21701	22,9	58,58
12	Сүхбаатар	37214	5407	20772	14,52	55,82
13	Сэлэнгэ	69407	11335	33942	16,33	48,09
14	Төв	59250	10669	30814	18	51,91
15	Увс	47509	8665	29421	18,23	61,93
16	Ховд	48679	12486	25266	25,64	51,09
17	Хөвсгөл	79419	15629	43495	19,67	54,77
18	Хэнтий	45433	7328	23765	16,12	52,32
19	Дархан-Уул	62730	16665	31897	26,56	50,85
20	Орхон	65351	12087	32366	18,49	49,54
21	Хан-Уул, Багануур, Багахангай	102800	24565	49589	23,89	48,91
22	Баянзүрх, Налайх	206837	35907	90080	17,36	43,55
23	Сүхбаатар	89514	15048	41717	16,81	46,6
24	Баянгол	120625	24221	60893	20,08	50,05
25	Сонгинохайрхан	179195	31510	77905	17,58	43,47
26	Чингэлтэй	105112	16359	41678	15,56	39,65