Өнгөрсөн нэгдүгээр сарын 15-наас нийслэлийн төвийн зургаан дүүрэгт нөөцийн мах худалдаалж эхэлсэн билээ. Зах зээлийнхээс доогуур үнээр буюу үхрийн махыг кг-ийг нь 3700, хониныхыг 3200, ямааны махыг 2600 төгрөгөөр хүнсний томоохон худалдааны “Хүчит шонхор”, “Хар хорин”, “Баянгол”, “Бөмбөгөр”, “Бэлх” төв болон 319 дэлгүүрээр дамжуулан хэрэглэгчдэд нийлүүлж ирсэн. Гэтэл сүүлийн үед нөөцийн мах олдохоо байсан, нэг ёсондоо тасарсан гэж болно. Яагаад ийм байдалд хүрсэн, нөөцийн мах юуны учир худалдаанд байхгүй байгаа талаар Нийслэлийн захирагчийн ажлын албаны хүнсний хангамж хариуцсан мэргэжилтэн О.Уянгаас тодрууллаа.

-Нөөцийн мах юуны учир ховордов?

-Засгийн газрын 53 дугаар тогтоолоор хөдөө орон нутгаас жилд 15 мянган тонн мах улсын нөөцөд нийлүүлэх ёстой. Гэтэл энэ жилийн хувьд 12 мянган тонн мах л нийлүүлсэн. Нэг ёсондоо тогтоосон хэмжээндээ хүрээгүй гэсэн үг. Одоогоор манайд 1000 гаруйхан тонн мах байгаа. Үүнийг бид хуваарьтай худалдааны цэгүүдээр борлуулж байгаа.

-Нөөцийн махыг наадам хүртэл худалдаална гэсэн мэдээлэл гадуур таржээ. Энэ ортой мэдээлэл үү?

-Зарим үйлдвэрийн хувьд махны нөөц дууссан. Харин Багахангайн нийслэлийн өмчит үйлдвэрийн газарт багагүй нөөц бий. Иймээс мах борлуулах цэгүүд энэ үйлдвэрээс мах авч борлуулах байх.

Ч.БАТСАРУУЛ
“ӨДРИЙН ШУУДАН” СОНИН