УИХ-ын сонгуулийн 26 дугаар тойрогт хэсгийн хороогоо мэдэхгүй сонгогчид цөөнгүй байна. Тодруулбал, Сонгинохайрхан дүүргийн наймдугаар хорооны иргэд хэддүгээр хэсгийн хороонд очиж, саналаа өгөхөө мэдэхгүй байгаагаас эргэж буцах тохиолдол нэлээд гарч буй юм. Өмнө нь наймдугаар хорооныхон хороон дээрээ очиж саналаа өгдөг байсан, харин энэ удаад нийслэлийн 117 дугаар цэцэрлэгийн байранд очиж саналаа өгөхөөр хэсгийн хороог өөрчилсөн нь ийнхүү очих газраа мэдэхгүйд хүрч эргэж буцах тохиолдол гарч байгаа аж.

Нөгөөтэйгүүр, сонгогчид саналын хуудсан дээрээ яг ямар тэмдэглэгээ хаана нь хийхээ мэдэхгүй цаг нэлээд авч байна. Хэдийгээр саналын хуудсан дээр тодорхой мэдээлэл байгаа ч сонгогчдын хувьд учраа олохгүй байна гэх гомдол нэлээдгүй байна.