Сонгуулийн ерөнхий хорооноос өнөөдөр нам, эвсэл, төрийн бус байгууллагын сонгуулийн ажиглагч нарт сонгуулийн үеэр ашиглах техник, тоног төхөөрөмж болон санал авах байрны үйл ажиллагааг урьдчилсан байдлаар танилцууллаа.

Иргэн санал өгөх байранд иргэний үнэмлэхтэй ирж, хурууны хээгээ УБЕГ-ын мэдээллийн сан бүхий компьютерт шалгуулж бүртгэлийн хуудас авна. Ингэснээр сонгогч бүртгэлийн хуудсаа хэсгийн хорооны ажилтанд шалгуулж, нэрийн жагсаалтад гарын үсэг зурж, саналын хуудас авах юм. Сонгогч саналаа өгсний дараа саналын хуудас тоолох машинд уншуулах юм байна. Нам, болон нэр дэвшигчдийг төлөөлж буй ажиглагч нар санал өгөх ажиллагаатай танилцаж, сонгууль хэрхэн зохион байгуулагдах, санал авах үеэр ажиглагч нар хэрхэн ажиглах талаар мэдээллийг СЕХ-ны мэргэжилтнүүд танилцууллаа.