ОХУ-ын Казань хотод энэ сарын 9-23-нд Олон улсын шатрын холбооны эмэгтэйчүүдийн Гранпри тэмцээний цуврал боллоо. Урилгаар 12 шатарчин тойргийн журмаар оюун ухаанаа уралдуулснаар Энэтхэгийн их мастер Хампи Конеру 7,5 оноогоор тэргүүлж, түүнтэй ижил оноо авсан ч Словенийн Анна Музычук коэфициентийн зөрүүгээр аман хүзүүдэж, Литвын Виктория Чмилите 7,0 оноогоор хүрэл медаль хүртсэн. Түүнчлэн дөрвөөс 12 дугаар байрыг Хоу Ифань, Александра Костенюк, Элина Даниэлян, Татьяна Косинцева, Катерина Лагно, Антоанета Стеафанова, Надежда Косинцева, Алиса Галлямова, Бетул Йилдыз нар эзэлсэн юм.

Гранпри тэмцээний дараагийн цуврал Арменийн Жермук (VII.16-29), Туркийн Стамбулд (X.22-XI.05) болох бөгөөд их мастер Б.Мөнгөнтуул урилгаар оролцох юм.