Монголын хөрөнгийн бирж 2012 оны зургадугаар сарын 18-22-ны хооронд таван удаагийн арилжаа явуулж, нийт 56 ХК-ийн 2.1 сая ширхэг хувьцааг 7.3 тэрбум төгрөгөөр арилжсан байна. ТОР-20 индекс 19164.80 нэгжид хүрч, өмнөх долоо хоногоос 317.81 нэгжээр буюу 1.7 хувиар өсчээ. Индексийн сагст багтах Адуунчулуун /59.8%/, Багануур /26.1%/, Шивээ овоо /16.6%/, Могойн гол /12.5%/, Монголиа девелопмент ресурсес /5.2%/, Шарын гол /5.0%/, Таван толгой /3.1%/, Ремикон /1.6%/, Монгол шилтгээн /1.1%/ зэрэг ХК-ийн үнэт цаасны ханш өссөн нь индексийн өсөлтөд нөлөөлсөн байна. Зах зээлийн нийт үнэлгээ 57.9 тэрбум төгрөгөөр буюу 3.2 хувиар өсч, 1 их наяд 835.6 тэрбум төгрөг болсон байна.

Ханш нь хамгийн их өссөн үнэт цаасны тоонд Адуунчулуун /59.8%/, Дархан гурил тэжээл /51.8%/, Хөдөө тээвэр /31.4%/ зэрэг ХК-иудын үнэт цаас орж байна. Ханш нь хамгийн их буурсан үнэт цаасны тоонд Бэрх уул /18.6%/, Сав шим /15.0%/, Баянтоорой /15.0%/ зэрэг ХК-иудын үнэт цаас орж байна.

Нийт 56 үнэт цаас арилжигдсанаас 30 үнэт цаасны ханш өсч, 17 үнэт цаасны ханш буурч, 9 үнэт цаасны ханш тогтмол байлаа Тоо ширхгээр хамгийн олон ширхэг арилжигдсан үнэт цаасанд Шивээ овоо /946.9 мянган ширхэг/, Э транс ложистикс /455.9 мянган ширхэг/, Нако түлш /350.0 мянган ширхэг/ зэрэг компанийн үнэт цаас орж байна. Үнийн дүнгээр Шивээ овоо /6.7 тэрбум төгрөг/, Эрдэнэт хүнс /142.7 сая төгрөг/, АПУ /90.3 сая төгрөг/ зэрэг компанийн үнэт цаас арилжигдсан байна.