Олон улсын олимпийн хороо үүсгэн байгуулагдсан өдөр буюу зургадугаар сарын 23-нд Олон улсын олимпийн өдөр тохиодог. Энэ өдрийг угтаж, Монголын үндэсний олимпийн хорооны удирдлаууд өнөөдөр үе үеийн олимпийн медальтнуудыг хүлээн авч, уулзан хүндэтгэл үзүүллээ. Монголын спортын түүхэнд олимпийн наадмаас медаль хүртсэн 19 тамирчин бий. Зарим нь хорвоогийн мөнх бусыг үзүүлж, зарим нэг нь тэмцээн, уралдаан, бэлтгэл сургуулилт гээд хилийн чанадад байгаа тул Олимпийн өдрийн хүндэтгэлд Монгол Улсаас төрсөн олимпийн анхны медальтан Ж.Мөнхбат, Ч.Дамдиншарав, Д.Сэрээтэр тэргүүтэй үе үеийн медальтнууд хүрэлцэн ирэв. Сар гаруй хугацааны дараа эхлэх Лондонгийн олимпийн наадамд эх орноо төлөөлөн оролцохоор бэлтгэлээ сургуулилтаа базааж буй Бээжингийн олимпийн аварга Н.Түвшинбаяр, мөнгөн медальт П.Сэрдамба, Афины олимпийн хүрэл медальт Х.Цагаанбаатар нараас гадна Э.Бадар-Ууган /Бээжингийн олимпийн аварга/, Д.Нармандах, Р.Даваадалай, Н.Энхбат, Н.Баярсайхан нарын алдартнүүд Олимпийн өдрийн арга хэмжээнд оролцсон юм.

Мөн энэ үеэр Монголын олимпийн түүхийг бүтээлцэж явсан, олимпизмийн хөгжилд хувь нэмрээ оруулсан эрхмүүдэд МҮОХ-ны дээд шагнал гардуулсан. Тодруулбал, МҮОХ-ны дээд шагнал “Олимпийн алтан од” одонгоор Р.Даваадалай /Москва-1980, жүдо бөхийн төрөлд хүрэл медаль хүртсэн/, Н.Энхбат /Сөүл-1988, боксын төрөлд хүрэл/, Н.Баярсайхан /Барселона-1992, боксын төрөлд хүрэл/, Д.Нармандах /Атланта-1996, жүдо бөхийн төрөлд хүрэл/, БТСГ-ын Ахмадын хорооны дарга, Гавьяат багш Ц.Даржаа нарыг шагнав. Түүнчлэн спортын салбарт, тэр тусмаа олимпизмийг хөгжүүлэхийн төлөө ажиллаж буй эрхмүүдийг МҮОХ-ны “Алтан очир”, “Олимпийн алдар” болон “Алтан медаль”-иар шагнаж, урамшуулсан байна.

Олимпийн өдрийн шагналтнууд:

 “Олимпийн алтан од” одон

1. Ц.Даржаа – Монгол Улсын Гавьяат багш, БТСГ-ын ахмадын хорооны дарга
2. Р.Даваадалай – Монгол Улсын Гавьяат тамирчин, олимпийн наадмын хүрэл медальт
3. Н.Энхбат – Монгол Улсын Гавьяат тамирчин, олимпийн наадмын хүрэл медальт
4. Н.Баярсайхан – Монгол Улсын Гавьяат тамирчин, олимпийн наадмын хүрэл медальт
5. Д.Нармандах – Монгол Улсын Гавьяат тамирчин, олимпийн наадмын хүрэл медальт

“Алтан очир” одон

1. Ч.Дагвадорж – Тэшүүрийн холбооны ЕНБД
2. Б.Нямсүрэн – Буудлагын холбооны ЕНБД

“Олимпийн алдар” одон

1. Т.Амаржаргал – Байт харвааны ЕНБД
2. Ч.Амарсанаа – Ширээний теннисний холбооны ЕНБД
3. Г.Нямдэлгэр – Талбайн теннисний холбооны ЕНБД
4. Б.Дашдорж – Сагсан бөмбөгийн холбооны ЕНБД
5. Д.Энхбаатар – ОУХМ, “Москва 1980” олимпийн наадамд хүндийг өргөлтөөр оролцсон
6. Ж.Лувсан-Иш – Биеийн тамирын багш, спортын мастер
7. Х.Ганхуяг – БТСГ-ын ажилтан
8. Ч.Чулуунбаатар – ГЕГ-ийн тэргүүн дэд дарга, спортын мастер

“Алтан медаль”

1. Д.Батзориг – МАМСХ-ны тамирчин
2. Б.Бадрах – хөнгөн атлетикийн ахмад тамирчин, спортын мастер
3. Ц.Бадамцэрэн – хөнгөн атлетикийн ахмад тамирчин, спортын мастер
4. Д.Янжмаа – хөнгөн атлетикийн ахмад тамирчин, спортын мастер
5. Г.Батхуяг – НХЭГ-ын ахлах байцаагч, цагдаагийн хошууч
6. Я.Сайнбаяр – Авто ашиглалтын механик инженер 
7. Б.Довдон – ахмад тамирчин

Гэрэл зургийг ЭНД дарж үзнэ үү.