“Камертон 2” шоуг зорин ирсэн авьяаслаг залуус шат ахих тусам илүү их сайжирч байгаа нь хоёрдугаар шатны шалгаруулалтаас илхэн харагдаж байгаа билээ. Жишээлбэл, 435 дугаартай оролцогч Г.Сонинхүү шоуны нэгдүгээр шатандаа арай л гэж тэнцэж байсан бол харин түүний хоёрдугаар шатны тоглолт шүүгчдийг алмайруулж чаджээ. Тэрбээр энэ удаад “Харанга” хамтлагийн “Шүүдэр цэцэг” дууг их л эвлэгхэн дуулчихсан шүү. Өөрчлөгдөж шинэчлэгдэн орж ирэх залуусыг харах бүртээ сэтгэл догдлолоо барьж ядан байдаг шүүгч Д.Болд “Сонинхүү чи ёстой сонин хүн юм аа, энэ дууг бараг л R&B, soul урсгалаар маш сайн дууллаа” гэж магтаалийн үгээ харамгүй хайрлаж байгаа харагдсан шүү.