Элсэлтийн ерөнхий шалгалтын зөв хариултыг зургадугаар сарын 17-ны өдөр www.eec.mn  сайтад тавьжээ. Өмнө нь төсөөлж байсныг бодвол энэ сайт ачаалал багатай, эсвэл хүчин чадлыг нь сайжруулсан бололтой. Ямартай ч сонирхсон мэдээллээ саадгүй авч дөнгөв. Тэндээс авсан мэдээллээр энэ жил улсын хэмжээнд нийт 43 мянга 87 шалгуулагч 10 хичээлээр давхардсан тоогоор 182 мянга 142 шалгалт өгөхөөр бүртгүүлжээ. Тиймээс шалгалтыг 52 төвийн 5556 анги, танхимд зохион байгуулав. ЭЕШ өгөх явцад зөрчлүүд илэрсэн тухай иргэдээс ихээхэн гомдол мэдүүлж байсан. Тухайлбал, химийн шалгалтын зөв хариулт байгаагүй, математикийн хичээлийн шалгалтыг 10 минут дутуу авсан, баталгаажуулах код дутсан гээд өнгөрсөн жилүүдийн нэгэн адил дахин сэдэрсэн. Тиймээс ч иргэдийн эрх ашгийг хамгаалах үүднээс барагдуулах үүднээс Боловсролын үнэлгээний төвийн Хяналт шалгалтын комисс элсэлтийн шалгалт дууссанаас хойш тав хоногийн турш ажиллаж, нийт 98 гомдол хүлээн авсан байна. Хүснэгтээр танилцуулбал,

№	Өргөдөл	Хот	Хөдөө	Нийт	Тайлбар
1.	Вариантаа тавиагүй, гарын үсэг зураагүй мартсан	6	26	32
2.	БХИС дээр математикийн шалгалтыг 80 минут авсан	16		16	Хоёр заал
3.	Батламжаа харьяа аймагтаа шилжүүлж авах		16	16	Дархан-Ул аймгаас шилжүүлэх
4.	“Хүрээ” дээд сургуульд математикийн шалгалтыг 80 минут авсан	11		11	24511 тоот зааланд авсан шалгалт
5.	Бодлого алдаатай эсэх	15	8	23

98 иргэн нийтдээ таван төрлийн л гомдол гаргаснаас үзвэл зөрчил илэрсэн бололтой. Иргэдийн ирүүлсэн зөрчил гомдлын тухай Боловсролын үнэлгээний төвийн мэргэжилтэн М.Гантуяагаас тодрууллаа.

-Нийт 98 гомдол ирсэн юм байна. Эдгээр гомдлыг шийдвэрлэхийн тулд хяналт, шалгалтын комисс хэрхэн ажиллаж байна вэ?

-Зургадугаар сарын 8-наас таван хүнтэй хяналт шалгалтын комисс байгуулагдсан. Шалгалт дууссаны дараах тав хоногт өргөдөл, гомдлыг хүлээн авах ба одоогоор хяналт шалгалтын комисс ирсэн гомдлуудад хариу өгөх ажлыг хийж байна. Гомдол тус бүрийг нягтлан үзэж тухай бүрт нь хариултыг нь илгээж эхэллээ. Тэгэхээр эдгээр гомдлын дийлэнх нь вариант болон гарын үсгээ тавиагүй учраас шалгалтын хуудас баталгаажаагүй тохиолдол байна. Мөн химийн шалгалтын материал алдаатай байсан гэсэн гомдол их ирсэн. Үүнд хариу өгөхөд, шалгалтын материалыг хянахын тулд шалгалт эхлэхээс өмнө хоёр хоногт дахин экспертүүд ажилладаг болохоор шалгалтын материалд ямар нэгэн алдаа гараа гэж үзэж байна. Гэхдээ бид гомдлын дагуу дахин шалгаж байна.

-БХИС дээр математикийн шалгалтыг 80 минут авсан гэсэн. Үүнээс болж хохирсон сурагчдын гомдлыг хэрхэн зохицуулах вэ?

-БХИС-д математикийн шалгалтыг 80 минут авсан ньтогтоогдсон. Тиймээс ямар ч байсан сурагчдыг хохироохгүйн тулд арга хэмжээ авна. Жишээ нь, 80 минутанд хийж гүйцэтгэсэн тухайн сурагчийн материалыг хянаж үзээд, хугацаандаа хэр гүйцэтгэсэн байна вэ гэдгээс хамаарч нөхөлт оноо өгөх байдлаар зохицуулна.  Ингээд долдугаар сарын 1 гэхэд шалгалтын дүн оноог нийтэд танилцуулах юм.