Жил бүрийн зургадугаар сарын 12-нд тохиодог “Хүүхдийн хөдөлмөрийн эсрэг дэлхийн өдөр”-ийг Төв аймагт тэмдэглэн өнгөрүүллээ. Өдөрлөгийн үеэр хүүхдүүдийн дунд “Хүүхдийн хөдөлмөр” сэдэвт гар зургийн уралдаан, шүлгийн уралдаан зохион байгуулж, хүүхдийн эрх зүйн актын талаарх мэдээллийг олон нийтэд хүргэсэн байна. Төв аймгийн хэмжээнд хөдөлмөр эрхэлдэг 300 гаруй хүүхэд байдаг ажээ. Харин харьцангуй хүнд хөдөлмөр эрхэлдэг хүүхдүүд байдаггүй гэнэ.

Хүүхдийн хөдөлмөрийн эсрэг энэ өдрийг хүүхдийн төлөө хэлтсээс гадна Ажил олгогч эздийн холбоо, аймгийн Үйлдвэрчний эвлэл хамтран зохион байгуулжээ. Ажил олгогч эздийн холбооноос хүүхдийн хөдөлмөрийн эсрэг төрөл бүрийн гарын авлага тарааж байснаас гадна “Хүүхдээр хөдөлмөр эрхлүүлээгүйд баярлалаа” гэсэн уриа, гарын авлагыг аймгийн төвийн байгууллагуудаар тараажээ. Зуны урин цагт хувиараа алт олборлогчид хүүхдүүдийг ажиллуулах, мөн баяр наадмаар хурдан морь хүүхдээр  унуулах явдал их байдаг. Энэ бүхэнд Төв аймгийн Хүүхдийн төлөө хэлтэс, Ажил олгогч эздийн холбоо, Үйлдвэрчний эвлэл, Уяачдын холбооноос хяналт тавьж, хүүхдийг даатгалд хамруулж харилцан гэрээ хийсний үндсэн дээр зөвшөөрөл өгөн ажилладаг болоод байгаа юм байна.